مەكتەبی سیاسی یەكێتی لە یادی راپەڕیندا داوا لە هاوڵاتیان دەكات بە بەشداریكردنی فراوان لە هەڵبژاردنی پەرلەمانی كوردستاندا كە بڕیارە لە مانگی حوزەیرانی ئەمساڵدا بەڕێوەبچێت رێڕەوی حکومڕانی "چاکترو گەشەپێبدەن" و داواش دەكات پێكەوە "هەڵبژاردنی داهاتو بکەینە دەرفەتی زێرین بۆ بوژاندنەوەی ئامانجەکانی راپەڕینی دێرین."
ئاوێنە: مەكتەبی سیاسی یەكێتیی نیشتمانیی كوردستان، لە پەیامێكدا بە بۆنەی یادی 33 ساڵەی راپەڕینی خەڵكی كوردستانەوە، رایگەیاند"ئەمڕۆش دوای زیاتر لە سێ دەیە لە راپەڕین و پرۆسەی سیاسیی کوردستان وا لە حوزەیرانی ئەمساڵدا رومان لە هەڵبژاردنی داهاتوی پەرلەمانی کوردستانە و دەرفەتێکی زێڕین هاتۆتەکایەوە تا بەگیانی پڕ جۆشوخرۆشی سەرەتاکانی ڕاپەڕینی دێرینەوەو بە دەنگدانی دیموکراتی لە هەڵبژاردنێکی پاک و بێگەردا ئەزمونی خۆماڵیمان مشتوماڵ بکەینەوە."
وتوشیەتی"پێکەوە بە بەشداری فراوان و کارای نەوە تازەکانی کوردەواری رێڕەوی حکومڕانیمان چاکترو گەشەپێبدەین و ئەوەی ماوە لە ئامانجە ستراتیژییەکانی ڕاپەڕین بەدیبهێنین. بە جۆرێک هەڵبژاردنی داهاتو بکەینە دەرفەتی زێرین بۆ بوژاندنەوەی ئامانجەکانی راپەڕینی دێرین."
دەقی پەیامەكە:
کەسوکاری سەربەرزی شەهیدان
کۆمەڵانی خەڵکی کوردستان
یادی 33 ساڵەی راپەڕینی گەلەکەمان لە هەمو کۆمەڵانی خەڵکی کوردستان پیرۆز بێت، بەتایبەتی لە کچان و کوڕانی کوردەواری کە لە سایەی ئەزمونی خۆبەخۆ و دیموکراتی وڵاتەکەماندا پێگەییون و ئەمڕۆش دیمەنی هەرە گەشی پرۆسەی سیاسی وڵاتەکەمان پێکدێنن.
لە 5ی ئازاری دەروازەی راپەڕین، لە ڕانیەوە، بۆ زەماوەندی ڕزگاری لە سلێمانی و روخانی قەڵای ستەمی بەعس لە هەولێری هۆلاکۆ بەزێن و دهۆکی رەنگین و خانەقینی بوکی گەرمسێرو تەواوی شارو شارۆچکەکانی تر تا نەورۆزی ڕزگاری کەرکوکی قودسی کوردستان، هەڵمەتی راپەرین داستانێکی نیشتمانیی گەلەکەمان بو بە ڕابەرایەتی یەکێتیی نیشتمانیی کوردستان و جەماوەری خۆراگری بەعس بەزێن.
ئەمڕۆش دوای زیاتر لە سێ دەیە لە راپەڕین و پرۆسەی سیاسیی کوردستان وا لە حوزەیرانی ئەمساڵدا رومان لە هەڵبژاردنی داهاتوی پەرلەمانی کوردستانە و دەرفەتێکی زێڕین هاتۆتەکایەوە تا بەگیانی پڕ جۆشوخرۆشی سەرەتاکانی ڕاپەڕینی دێرینەوەو بە دەنگدانی دیموکراتی لە هەڵبژاردنێکی پاک و بێگەردا ئەزمونی خۆماڵیمان مشتوماڵ بکەینەوەو پێکەوە بە بەشداری فراوان و کارای نەوە تازەکانی کوردەواری رێڕەوی حکومڕانیمان چاکترو گەشەپێبدەین و ئەوەی ماوە لە ئامانجە ستراتیژییەکانی ڕاپەڕین بەدیبهێنین. بە جۆرێک هەڵبژاردنی داهاتو بکەینە دەرفەتی زێرین بۆ بوژاندنەوەی ئامانجەکانی راپەڕینی دێرین.
لە بیرەوەری هەمیشە گەشاوەی بڵێسەی راپەڕیندا
سڵاو لە شەهیدانی ڕاپەڕین و سەرجەم شەهیدانی بزوتنەوەی ڕزگاریخوازی گەلەکەمان و خەباتی دیموکراتی لە عیراقدا
سڵاو لە پێشمەرگە قارەمانەکان و رێکخستنەکانی داینەمۆی راپەڕین.
گەلی کوردستانیش، بە هەمو پێکهاتەکانییەوە، هەر شاد و سەربەرز و سەرکەوتوبن
مەکتەبی سیاسی یەکێتیی نیشتمانیی کوردستان
٥-٣-٢٠٢٤