پاش ئەوەی ئەمڕۆ ئەنجومەنی سەركردایەتی پارتی سۆسیال دیموكراتی كوردستان لە كۆبونەوەی گوڵەخانە بڕیاری دورخستنەوەی لە ریزەكانی حزبەكە دا، عەبدوڵای حاجی مەحمود بڕیارەكە رەتدەكاتەوەو دەڵێت، من جێگری سەرۆكی حزبەكەم و ئەنجومەنی سەركردایەتی دەسەڵاتی دورخستنەوەی جێگری سەرۆكی نییە.
ئاوێنە: عه‌بدوڵای حاجی مه‌حمود، ئەمڕۆ سێشەممە، لە كۆنگرەیەكی رۆژنامەوانیدا رایگەیاند، "جێگری سەرۆکی حیزبم و ئەنجومەنی سەرکردایەتی دەسەڵاتی دورخستنەوەی جێگری سەرۆکی نییە، ئەو کۆبونەوەیەی ئەمڕۆش ئەنجامدراوە کۆبونەوەی بەرفراوانە و لە کۆبونەوەی بەرفراواندا ناتوانرێت بڕیار بدرێت لەسەر دورخستنەوەی ئەندامانی ئەنجومەنی سەرکردایەتی یان سەرۆک و جێگری سەرۆكی حزب.
وتیشی: ئەو وەک جێگری سەرۆکی پارتی سۆسیال دیموکراتی کوردستان دەسەڵاتی هەیە تا کۆنگرەی ئاسایی دەبەسترێت و بڕیاری لابردنی لە پۆستەکەی دەدرێت، چونکە بەپێی پەیڕەوی ناوخۆیی حزب، تەنها لە کاتی بەستنی کۆنگرەی ئاساییدا دەتوانرێت بڕیاری دورخستنەوەی سەرۆک یان جێگری سەرۆک بدرێت.
ئه‌وه‌ش له‌كاتێكدایه كه ئه‌مرۆ سێشه‌ممه له كۆبونه‌وه‌ی محه‌مه‌دی حاجی مه‌حمود، سه‌رۆكی پارتی سۆسیال دیموكراتی كوردستان له گوڵه‌خانه له‌گه‌ڵ ئه‌ندامانی ئه‌نجومه‌نی سه‌ركردایه‌تی و مه‌كته‌بی سیاسی حزبه‌كه بڕیاردرا به دور خستنه‌وه‌ی عه‌بدوڵای حاجی مه‌حمود، له ریزه‌كانی حزبی سۆسیالیست دیموكراتی كوردستان و لێسه‌ندنه‌وه‌ی سه‌رجه‌م ئه‌و موڵك و ماڵه‌ی هی حزبه‌كه‌یه له‌لایه‌تی.