بڕیارە بزوتنەوەی گۆڕان بەرلە هەڵبژاردنی پەرلەمانی كوردستان، رێكخەری گشتی و ئەندامانی خانەی راپەڕاندنی حزبەكە هەڵبژێرێت. ئەندامێكی جڤاتی نیشتمانی بزوتنەوەكە دەڵێت، بۆ ئەو مەبەستە سەرقاڵی ئامادەكاریین.
ئاوێنە: نزار مەحمود، ئەندامی جڤاتی نیشتمانیی بزوتنەوەی گۆڕان، ئەمڕۆ چوارشەممە، بە روداوی راگەیاند، "ئێستا بزوتنەوەکە سەرقاڵی ئامادەکارییە بۆ هەڵبژاردنی خانەی راپەڕاندن و رێکخەری گشتی، ئەگەر هەڵبژاردنیش نەکرێت، بەمزوانە ئەو هەڵبژاردنە نێوخۆییە هەر دەکات."
بەپێی بڕیاری کۆمیسیۆنی باڵای سەربەخۆی هەڵبژاردنی عێراق، هیچ گروپێک ناتوانێت وەکو لیست بەشداری لە هەڵبژاردنی داهاتوی پەرلەمانی کوردستان بکات و تەنیا حیزب و كاندیدی سەربەخۆ دەتوانن خۆیان بەشداری بکەن، لەنێو حیزبەکانیشدا، مەرجە وادەی کۆنگرەیان بەسەرنەچوبێت و سەرکردایەتی و کەسی یەکەمیشیان هەڵبژاردبێت.
هەرچەندە بزوتنەوەی گۆڕان لە 20 و 21ـی کانونی دوەمی 2024ـدا کۆنفرانسی نیشتمانیی بەستوە، بەڵام بەو پێیەی خانەی راپەڕاندن و رێکخەری گشتیی هەڵنەبژاردوە، کۆمیسیۆن رێگەی نادات وەکو لیست یان حیزب بەشداریی بکات.
نزار مەحمود وتوشیەتی"لە 14ـی ئاداری 2024، مەکۆکان هەڵبژاردنی نێوخۆیی دەکەن، دواتر رۆژێک بۆ هەڵبژاردنی خانەی راپەڕاندن و رێکخەری گشتی دیاری دەکرێت."