سەرلەبەیانی ئەمڕۆ هەینی، لەئەنجامی بۆردومانی فڕۆكەكانی توركیا لە سنوری گوندی دێوكی سەربە شارۆچكەی شیلادزێ، دو هاوڵاتی مەدەنی شەهیدبون و یەكێكی دیكەش برینداربو.

ئاوێنە: بریندارەكە بۆ نەخۆشخانەی فریاكەوتن لە ئامێدی گواستراوەتەوە. لەبەردەم نەخۆشخانەكە یەكێك لە كەسوكاری قوربانییەكان بە پێگەی "گاڤ"ی وت، سەعات 6ی سەرلەبەیانی ئەمڕۆ هەینی، ئەو خزمانەی كە سێ كەس بون چونەتە نێو رەزەكەی خۆیان لەناوچەكە، لە سەعات 6:30 خولەك، فڕۆكە بۆردومانی كردون.

ئەوەشی خستۆتەڕو، لە ئەنجامی بۆردومانەكە دوان لەو هاوڵاتییە مەدەنیانە شەهیدبون و یەكێكی دیكەیشیان برینداربوەو بریندارەكە تەلەفۆنی بۆ كردون و لە روداوەكە ئاگاداری كردون.

هەر سێ هاوڵاتییە قوربانییەكە بەقسەی ئەو خزمەیان، گەنجن و یەكێكیان لە دایكبوی 1984 و یەكێكی دیكەیان 1988 و ئەویدیكەیان لە دایكبوی 1995ەو دۆخی بریندارەكە "باشە".

ئەو باسی لەوەشكرد، پێشتر ئەو كەسانە چونەتە ئەو شوێنە، شوێنێكی مەترسیدار نەبوەو یەكەمجارە فڕۆكە ئەو شوێنە بۆردومان دەكات.