سەمیر هەورامی، گوتەبێژی جێگری سەرۆکوەزیرانی حکومەتی هەرێمی کوردستان، بەبێ ئەوەی ناوی پێشەوا هەورامی بهێنێت، دەڵێت "ئەو کەسەی بەناوی گوتەبێژی حکومەتەوە قسە دەکات، تەنها تەعبیر لەخۆی و تیمە وەزاریەکەیان دەکات".
ئاوێنە: سەمیر هەورامی، گوتەبێژی جێگری سەرۆکوەزیرانی حکومەتی هەرێمی کوردستان لەراگەیەندراوێکدا وەڵامی لێدوانەکانی گوتەبێژی حکومەتی هەرێمی کوردستان دەداتەوەو دەڵێت "لەکابینەی نۆیەمی حکومەتی هەرێمدا، کەسێکمان نەبووە و نییە کە وەک وتەبێژ، هەڵوێستەکانی تەعبیری لە سیاسەت و بۆچونەکانی تیمی وەزاری یەکێتی بکات، بەڵکو ئەو کەسەی بەناوی وتەبێژی حکومەتەوە قسە دەکات، تەنها تەعبیر لە خۆی و تیمە وەزاریەکەیان دەکات بۆیە ئەوەی وتوویەتی هیچ پەیوەندییەکی بە یەکێتییەوە نییە".
دەشڵێت، "لەبری لێدوان و قسەو تۆمەت بەخشینەوە، واباشتر بوو بەهەموومانەوە هەوڵی چارەسەر کردنی گرفتەکان بدەین و مافی موچەخۆران دەستەبەر بکەین. هەرێمی کوردستان و دەستکەوتەکان بەبێ متمانە و پشتگیری خەڵکی کوردستان و تەنها بە دروشم ناپارێزرێت".
ئەمە لەکاتێکدایە کە ئێوارەی ئەمڕۆ پێشەوا هەورامانی، گوتەبێژی حکومەتی هەرێمی کوردستان راگەیەندراوێکی لەبارەی بڕیارەکانی دادگای فیدراڵی بڵاوکردەوەو رایگەیاند "ئەوانەی لەکوردستان پشتگیری لەدادگای فیدرالی دەکەن خۆفرۆشن".