موقتەدا سەدر، رێبەری رەوتی سەدر بڕیاریدا بە پێكهێنانی پێنج لیژنەی ناوەندیی بۆ رەوتەكەی كە یەكێك لەوانە لیژنەی فراكسیۆنە دەستلەكاركێشاوەكەی رەوتەكەیە لە پەرلەمانی عێراق.
ئاوێنە: موقتەدا سەدر، دوێنێ 28ی ئادار لە نوسراوێكدا بڕیاریداوە بە پێكهێنانی پێنج لیژنەی ناوەندیی كە یەكێك لەوانە لیژنەی فراكسیۆنی سەدری دەستلەكاركێشەوەیە لە پەرلەمانی عێراق و حەسەن عەزاری كراوەتە سەرۆكی لیژنەكە.
سەدر لە نوسراوەكەیدا لیژنە ناوەندییەكانی راسپاردوە بە سەرپەشتیكردنی جێبەجێكردنی ئەو راسپاردانەی كە دوێنێ 28ی ئادار بڵاویكردونەتەوەو داواشی لە لیژنەكان كردوە راپۆرتی هەفتانە پێشكەشی نوسینگە تایبەتەكەی خۆی بكەن.
دوێنێ موقتەدا سەدر لە پەیامێكدا داوای كرد كە پێویستە پەیوەندییەكان لەگەڵ بنكەی جەماوەریی رەوتەكە بەردەوامیان پێ بدرێت و لەوبارەیەشەوە چەند راسپاردەیەكی خستەڕو لەوانە، سەردانی خێزانی "شەهیدان"، ئامادەبون لە پرسەكانداو سەردانی نەخۆشەكان و چەند راسپاردەیەكی تر.