ئەندامێكی وەفدی عێراق لە ئەمریكا رایگەیاند، محەمەد شیاع سودانی، سەرۆك وەزیرانی عێراق، لە كۆبونەوەی ئەمڕۆیدا لەگەڵ ئەنتۆنی بلینكن، وەزیری دەرەوەی ئەمریكادا، وتی، قەوارەی هەرێم دەستورییەو مەترسی لەسەر نییە، وەزیری دەرەوەی ئەمریكاش داوای لە سودانی كرد دەست بە هەناردەی نەوتی هەرێم بكرێتەوە.
ئاوێنە: دیلان غەفور، ئەندامى ئەو وەفدەی عێراق کە سەردانی ئەمریکای کردوە بە کەناڵ8ی راگەیاند، محەمەد شیاع سودانى، سەرۆکوەزیرانی عێراق لەمیانی کۆبونەوەی لەگەڵ ئەنتۆنی بلینکن، وەزیری دەرەوەى ئەمریکا لەبارەی قەوارەی هەرێمی کوردستان قسەی کردوە و وتویەتی، " قەوارەیەکی دەستورییە و مەترسیى لەسەر نییە."
بەوتەی ئەو ئەندامەی وەفدەكەی عێراق، لەبارەی هەناردەکردنەوەی نەوتی هەرێمی کوردستانیش گفتوگۆ کراوە و "وەزیری دەرەوەی ئەمریکا داوایکردوە هەناردەى نەوتى هەرێمى کوردستان دەستپێبکاتەوە".
دیلان غەفور وتیشی، سودانى بە بلینکنی راگەیاندوە، "لەگەڵ دەستپێکردنەوەى هەناردەى نەوتی هەرێمی کوردستاندان و پێویستە هەموارى یاساى بودجە بكرێتەوەو گۆڕانکاریى لە گرێبەستە نەوتییەکانى هەرێمى کوردستان بکرێت.