ڕاوێژكاری ئاسایشی نیشتمانی عێراق ڕایده‌گه‌یه‌نێت، عێراق پێداگرە لەسەر كۆتاییهێنان بەهۆكاری كێشەكانی لەگەڵ توركیاو سەردانەكەی ئەردۆغانیش بۆ عێراق پەیوەندییەكانی بەغداو ئەنكەرە دەباتە ئاستێكی نوێ، ده‌شڵێت:"دەبێت گروپە چەكدارەكان بەزوترینكات چەكەكانیان دابنێن".
قاسم ئەعرەجی ڕاوێژكاری ئاسایشی نیشتمانی عێراق ڕایده‌گه‌یه‌نێت، "سەردانەكەی ڕەجەب تەیب ئەردۆغان بۆ عێراق بەكۆمەڵێك لێكگەیشتنی گرنگ لەچوارچێوەی پەیوەندی ستراتیژی‌و هاوبەشیی‌و گواستنەوەو وزەو ئاسایش‌و ئابوری‌و هاوكاری پیاوانی خاوەنكاری هەردولا كۆتایی دێت".
ده‌شڵێت:"سەرۆك وەزیرانی عێراق بایەخێكی گرنگیداوە بەدۆسیەی ئاوو لیژنەی باڵای بۆ پێكهێنراوە لەنێوان بەغداو ئەنكەرە، بۆ گفتوگۆكردن لەبارەی ئەو دۆسیەیە".
به‌وته‌ى ئه‌عره‌جى، "كۆماری ئیسلامی ئێران داوا لەعێراق دەكات ڕێككەوتنی ساڵی (1975) چالاك بكات كە لەئێستادا پێگەیشتوەو باشەو هاوپێچی (ج) لەگەڵدایەو پشكی ئاویی نێوان هەردوو وڵات چارەسەردەكات".
به‌رپرسه باڵاكه‌ى عێراق بۆ ڕۆژنامه‌ى سه‌باحى فه‌رمى وتویه‌تى:"سەردانەكەی ئەردۆغان گواستنەوەیەكی جۆری دەبێت لەئاستی پەیوەندیی‌و لێگەیشتن‌و هاوكاریی لەنێوان هەردوو وڵات، بەتایبەت كە عێراق پەرۆشە بۆ كۆتایهێنان بەهۆكاری ناكۆكییەكان، لەوانە چارەسەركردنی پرسی گروپە چەكدارەكان، ئەندامانی ئەو گروپانە دەبێت چەكەكانیان دابنێن‌و كۆتایی بەو دۆخە بهێنن بەزوترینكات".
ته‌ئكید ده‌كاته‌وه، "عێراق هەوڵی سەقامگیریی سیاسی هەمیشەیی دەدات، ئەوەش دەرفەتی تەواو بۆ حكومەت دەڕەخسێنێت بۆ جێبەجێكردنی پلانەكانی".
بەگوێرەی میدیاكانی توركیا، بڕیاڕوایه ئەردۆغان لەهەفتەی كۆتایی ئەم مانگەدا، سەردانی بەغدا بكات، ئەوەش بەیەكەم سەردان دادەنرێت لەماوەی (12) ساڵی ڕابردودا.