لەسەر بنەمای هاوتاکردنی مووچەی فەرمانبەرانی هەرێمی کوردستان و عێراق، مووچە و سەرجەم دەرماڵەکانی هێزی پێشمەرگە هاوتای هێزە ئەمنییەکانی عێراق دەکرێت، بڕیارە لە داهاتوویەکی نزیکدا دەرماڵەیەکی نوێ بۆ هێزەکانی پێشمەرگە خەرج بکرێت.
دوای چارەسەرکردنی کێشەی مووچە لەنێوان هەولێر و بەغدا، وەزیری پێشمەرگە داوایەک ئاراستەی سەرۆکایەتیی ئەنجوومەنی وەزیران دەکات، دوای چارەسەربوونی کێشەی هاتنی مووچەی پێشمەرگە لەلایەن عێراق، بەپێی ڕێنمایی ژمارە 21ـی ساڵی 2008 ئاماژە پێکراو، دەست بە خەرجکردنی دەرماڵەی بڕوانامە و پایە بۆ پێشمەرگە، گشت ئەفسەر و پلەدارانی وەزارەتی پێشمەرگە بکرێت.
لە وەزارەتی پێشمەرگە چوار جۆری دەرماڵە هەیە؛ خێزان و منداڵ، مەترسی، خواردن و بڕوانامە، بەڵام زیاتر لە 30 ساڵە دەرماڵەی بڕوانامە خەرج نەکراوە، ئێستا وەزارەتی پێشمەرگە داوا دەکات دەرماڵەکە خەرج بکرێت.
وەزارەتی پێشمەرگە لە 30 لیوای هاوبەش و نزیکەی 60 هەزار پێشمەرگە پێکهاتووە و بڕیارەکە دەیانگرێتەوە، ئەمە جگە لە یەکەکانی حەفتا و هەشتا کە داواکراوە ئەوانیش بگرێتەوە.
دەرماڵەی بڕوانامە لە ڕێژەی مووچەی بنەڕەتی زیاد بکرێت بەمشێوەیە دیاری کراوە:-
- دکتۆرا: 100%
- ماستەر: 75%
- بەکالۆریۆس: 45%
- دیبلۆم: 35%
-ئامادەیی 25%
- سەرەتایی و ناوەندی: 15%
دەرماڵەی پایە بەمشێوەیە:
- بەڕێوەبەر: 25%
- بەرپرسی بەش: 20%
- بەرپرسی هۆبە: 15%
مووچەی بنەڕەتی هێزی پێشمەرگە لە 140 هەزارەوە دەستپێدەکات تاوەکو ملیۆنێک و 148 هەزار دینار بەپێی پلەبەندی سەربازی، زیادەکەش لە %15 بۆ %100 دەبێت بەپێی پلە و بڕوانامە.
دوای بڕیارەکەی دادگەی فیدراڵی لەبارەی مووچەی فەرمانبەرانی هەرێمی کوردستان، پێویستە وەزارەتی دارایی عێراق مووچەی فەرمانبەرانی هەرێمی کوردستان و عێراق هاوشێوەی یەکتر خەرج بکات، بۆیە ئێستا وەزارەتی پێشمەرگە داوای لە ئەنجوومەنی وەزیران کردووە ڕەزامەندی لەسەر داواکارییەکە بدات، دواتر بەمەبەستی خەرجکردنی لەگەڵ لیستی مووچە بۆ بەغدا دەنێردرێت، هاوشێوەی پلەبەرزکردنەوەی فەرمانبەران و مووچەی وانەبێژان.
لە نووسراوێکدا ئەمینداری گشتیی وەزارەی پێشمەرگە داوای جێبەجێکردنی داواکارییەکە و هاوتاکردنی مووچە و دەرماڵەی سەرجەم هێزەکانی وەزارەتی پێشمەرگەی بە هەردوو یەکەی حەفتا و هەشتا کردووە هاوشێوەی هێزە ئەمنییەکانی عێراق