بەپێی پێشبینییەکانی کەشناسی عێراق، ھەفتەی داھاتوو شەپۆلێکی خۆڵبارین ڕوو لە ناوچەکە دەکات و شەپۆلەکە بەشێکی هەرێمی کوردستانیش دەگرێتەوە.
ئاوێنە: دەستەی کەشناسی عێراق ڕاگەیەنراوێکی سەبارەت بە کەش و هەوای ڕۆژانى داهاتوویی ناوچەکانى عێراق و هەرێمى کوردستان بڵاوکردەوە.
بەپێی ڕاگەیەندراوەکە، سەرەتای ھەفتەی داھاتوو شەپۆلێکی باران و خۆڵبارین زۆربەی شارەکانی عێراق دەگرێتەوە و تا رۆژی دووشەممە بەردەوام دەبێت.
دەستەکە ئاماژەى بەوەش کردووە، کە خۆڵبارینەکە بەشێک لە هەرێمی کوردستان دەگرێتەوە و کورتخایەن دەبێت.
ھاوکات بەڕێوەبەرایەتی گشتی کەشناسی و بوومەلەرزەزانی ھەرێم بڵاوی کردەوە، ئەمڕۆ ئاسمان پەڵەھەور و نیمچە ھەوردەبێت، پلەکانی گەرما بە نزیکەی ١ تا ٢ پلە بەرزتر دەبنەوە بەراوورد بە تۆمارکراوەکانی دوێنێ.
هەروەها سبەی ھەینی ئاسمان پەڵە ھەور و نیمچە ھەور دەبێت، لە ناوچە شاخاوییەکان ھەوری تەواودەبێت.