رابەری بزووتنەوەی ئیسلامی کوردستان رایدەگەیەنێت، نوێنەری فەرمییان گەیشتۆتە دیمەشقی پایتەختی سوریا و لەگەڵ ئەحمەد شەرع پەیوەندییەکی دۆستانەی دێرینیان هەیە. دەشڵێت "ئەگەر چاکسازیی لە هەرێم نەکرێت، رەشەبای گۆڕانکاریی دەگاتە ئێرەش".
ئاوێنە: عیرفان عەلی عەبدولعەزیز، رابەری بزووتنەوەى ئیسلامى کوردستان لە کۆنگرەیەکی رۆژنامەوانیدا رایگەیاند "بەم نزیکانە نوسینگەی تایبەتی بزووتنەوە لە دیمەشق دەکەینەوە".
وتیشی "نوێنەری فەرمیمان گەیشتووەتە دیمەشقی پایتەختی سوریا و پەیوەندییەکانمان لەگەڵ ئەحمەد شەرع ئاساییە و پەیوەندییەکی دۆستانەی دێرینمان هەیە".
رابەری بزووتنەوەی ئیسلامی ئاماژە بەوەش دەکات، یەکێک لەئامانجەکانیان ئەوەیە چارەسەرێکی ئاشتیانە بۆ دۆخی کوردانی ڕۆژئاوا لەگەڵ ئەحمەد شەرع بدۆزنەوە و "هەوڵی چارەسەری کێشەکانی کورد بدەین".
لەبارەی پێکهێنانی حکومەتی هەرێمیشەوە، عیرفان عەلی ئاشکرایکرد "حکومەتی هەرێمی کوردستان وا زوو پێکناهێندرێت". ناوبراو جەختیشیکردەوە، ئەگەر چاکسازیی لە هەرێم نەکرێت، "رەشەبای گۆڕانکاریی دەگاتە ئێرەش".