مسته‌فا هیجری، سكرتێری گشتی حزبی دیموكراتی كوردستانی ئێران داوا له كارمه‌ندان و سه‌ربازانی هێزه چه‌كداره‌كانی ئێران ده‌كات بنكه ئه‌منی و سه‌ربازییه‌كان جێبهێڵن، ئه‌وه‌ش له‌پێناو "پارێزراوبونیان له هێرشه‌كان و پشتكردنیان له هێزه چه‌كداره سه‌ركوتكه‌ره‌كانی رژێمی ئێران."
ئاوێنه: مسته‌فا هیجری، سكرتێری گشتی حزبی دیموكراتی كوردستانی ئێران، ئه‌مڕۆ چوارشه‌ممه، له په‌یامێكدا رایگه‌یاند، هێرشی ئه‌مه‌ریکا و ئیسرائیل بۆ سەر بنکە ئەمنی و سەربازییەکانی ڕژێمی کۆماری ئیسلامیی ئێران، زۆر جار دەبێتە هۆی مەترسی بۆ سەر ژیانی خەڵکی مەدەنی و ئاسایی.
وتوشیه‌تی، "داواکارم هەمو سەرباز و كارمه‌ندانی خاوەن هەڵوێست و ئازادیخواز لە سەرانسەری ئێران و بە تایبەت لە کوردستان، پادگان و بنکە ئەمنی و سەربازییەکانی سوپا، ئەرتەش و هێزە چەکدارەکانی ئەم ڕژێمە بەجێبهێڵن و واز لە خزمەت و ئەرکی پێ ئەسپێردراویان بهێنن و بگەڕێنەوە باوەشی بنەماڵەکانیان. ئەمەش لە پێناو پارێزراوبونیانە لەم هێرشانە و پاشان پشتکردنیان لە ڕیزی هێزی چەکدار و سەرکوتکەری ڕژێم."