بە دامرکاندنەوەی جەنگی نێوان ئێران و ئەمریکا، کۆماری ئیسلامی ئێستا ڕووبەڕووی ئاڵنگارییەکی نوێ بووەتەوە: وەڵامدانەوەی چاوەڕوانییەکانی دوو گرووپ کە خواستەکانیان جیاوازە. لە لایەکەوە ئەو توندڕەوانەی خۆیان بە براوەی جەنگەکە دەزانن، لە لایەکی تریشەوە ئەو خەڵکەی کە ساڵانێکە گەمارۆ، هەڵاوسان و جەنگ، ماندوو و ناڕازی کردوون.
ئاوێنە: بەپێی ڕاپۆرتێکی «ڕۆیتەرز»، باڵە توندڕەوەکان لە ئێران پێیان وایە کۆماری ئیسلامی توانیویەتی لە بەرامبەر فشاری سەربازیی ئەمریکادا خۆڕاگر بێت و ئێستاش دەبێت لە دانوستانە ئەگەرییەکاندا لەگەڵ واشنتن هەڵوێستێکی توند بگرێتەبەر. ئەوان خوازیاری زیاتر بەهێزکردنی توانای سەربازی و بەردەوامیدان بە سیاسەتە بەرپەرچدەرەوەکانن، هەروەها دڵنیان لەوەی کە لە ئەگەری سەرهەڵدانی ناڕەزایەتی ناوخۆیی، حکومەت دەتوانێت بە بەکارهێنانی ئامرازە ئەمنییەکان دۆخەکە کۆنتڕۆڵ بکات.
لە بەرامبەردا، زۆرێک لە هاووڵاتیانی ئێران چاوەڕوانن هەر جۆرە کەمکردنەوەیەکی گەمارۆکان یان ئازادکردنی سەرچاوە داراییەکانی وڵات، بۆ باشترکردنی دۆخی ئابووری و بەرزکردنەوەی ئاستی خۆشگوزەرانی گشتی خەرج بکرێت. ئابووریی ئێران ڕووبەڕووی هەڵاوسانی بەرز، دابەزینی بەهای دراوی نیشتمانی، بێکارییەکی بەربڵاو و زیانەکانی دەرئەنجامی جەنگ بووەتەوە، وە نۆژەنکردنەوەی ژێرخانەکانیش پێویستی بە سەرچاوەیەکی دارایی زەبەلاح هەیە.
چوار بەرپرسی ئێرانی و بەرپرسێکی پێشوو کە قسەیان بۆ ڕۆیتەرز کردووە، دانیان بەوەدا ناوە کە ناڕەزایەتیی گشتی و ئەگەری دەستپێکردنەوەی خۆپیشاندانەکان یەکێکە لە نیگەرانییە سەرەکییەکانی دەسەڵات. بە وتەی ئەوان، سەرکردەکانی کۆماری ئیسلامی زۆر باش دەزانن کە ئەگەر ناتوانن بارودۆخی ئابووری باشتر بکەن، ئەوا لەوانەیە ڕووبەڕووی شەپۆلێکی نوێی ناڕەزایەتییەکان ببنەوە.
لە هەمان کاتدا، بەشێک لە هێزە توندڕەوەکان لە دانوستان لەگەڵ ئەمریکا ناڕازین و پێیان وایە ئێران نابێت بچێتە ناو ڕێککەوتنێکەوە لەگەڵ وڵاتێکدا کە بە وتەی ئەوان بەرپرسیارە لە کوژرانی ڕێبەری پێشووی کۆماری ئیسلامی. لەگەڵ ئەوەشدا، هەندێک لە بەرپرسان جەختیان لەوە کردووەتەوە کە بەهێزکردنی توانای سەربازی وەک پێشینەی سەرەکی وڵات دەمێنێتەوە، و پرۆسەی دووبارە بونیادنانەوەی هێزە چەکدارەکانیش بە خێرایی بەردەوام دەبێت.
شیکەرەوەکان دەڵێن حکومەتی ئێران ئێستا لە دۆخێکی هەستیاردایە: لە لایەکەوە دەبێت چاوەڕوانییە ئابوورییەکانی خەڵک بەڕێوەببات، لە لایەکی تریشەوە نابێت پشتیوانیی بنکە جەماوەرییە توندڕەوەکەی خۆی لەدەست بدات. بە بڕوای ئەوان، هەرچەندە لەوانەیە حکومەت لە هەندێک بواری کۆمەڵایەتیدا وەک پۆشاکی ژنان نەرمی زیاتر بنوێنێت، بەڵام پێدەچێت لە بەرامبەر هەر جۆرە ئاڵنگارییەکی سیاسی یان هەڕەشەیەک بۆ سەر پێکهاتەی دەسەڵات، ڕێبازێکی توند بگرێتەبەر.