وەزارەتی دەرەوەی عێراق ڕایگەیاند، وەزیری دەرەوەی ئێران سبەی یەکشەممە دەگاتە بەغدا. ئامانجی سەردانەکە تاوتوێکردنی پەیوەندییە دوقۆڵییەکان، هەماهەنگی ئەمنی و سیاسی، و پرسەکانی پەیوەست بە وزە و ئابوورییە.
ئاوێنە: ئەمڕۆ شەممە، وەزارەتی دەرەوەی عێراق لە ڕاگەیەندراوێکی كورتدا دەڵێت "عەباس عێراقچی وەزیری دەرەوەی ئێران بەیانی سبەی یەکشەممە لە سەردانێکی فەرمیدا دەگاتە بەغدا. ئامانجی ئەم سەردانە ئەنجامدانی زنجیرەیەک گفتوگۆیە لەگەڵ بەرپرسانی باڵای عێراق سەبارەت بە پەرەپێدانی پەیوەندییە دوقۆڵییەکان و تاوتوێکردنی دوایین پێشهاتەکانی ناوچەکە".
هاوکات بەپێی میدیاکانی عێراق، بەرنامەی کارەکانی عەراقچی بریتییە لە تاوتوێکردنی دۆسیەکانی وزە، گواستنەوە و، پەرەپێدانی هەماهەنگی ئابووری و بازرگانی نێوان هەردوو وڵات.