لە پەرەسەندنێکی نوێی گرژییەکان لە کەنداو، شەوی سێشەممە ویلایەتە یەکگرتووەکانی ئەمریکا زنجیرەیەک هێرشی ئاسمانی کردە سەر باشووری ئێران. ئەم هێرشانە دوای ئەوە هاتن کە سێ کەشتی بازرگانی لە گەرووی هرمز کرانە ئامانج، واشنتنیش ڕایگەیاند هێرشەکەیان وەڵامێکی "تۆڵەسەندنەوە" بووە بەرامبەر ئەو کارانەی تاران لە گەرووەکەدا ئەنجامی داون.
ئاوێنە: بەپێی زانیارییەکانی فەرماندەیی ناوەندی ئەمریکا (سێنتکۆم)، زیاتر لە ٨٠ پێگە بە چەکی ورد و پێشکەوتوو کراونەتە ئامانج، کە زۆرینەیان بریتی بوون لە نزیکەی ٦٠ بەلەمی خێرای سوپای پاسداران، هەروەها سیستمەکانی بەرگری ئاسمانی، ڕادارەکان و بنکەکانی مووشەکی دژە کەشتی لە باشووری ئێران.
لە بەرامبەردا، تەلەفزیۆنی فەرمی ئێران ڕایگەیاند کە دەنگی تەقینەوە لە ناوچەکانی قشم، سیریک و بەندەر عەباس بیستراوە. سوپای پاسدارانی ئێران لە وەڵامێکی خێرادا ڕایگەیاند کە بە بەکارهێنانی فڕۆکەی بێفڕۆکەوان و مووشەک، نزیکەی ٨٥ پێگەی سەربازی ئەمریکایان لە کوەیت و بەحرەین کردووەتە ئامانج و فڕۆکەیەکی جۆری "ئێم کیو-٩"یان خستووەتە خوارەوە.
لەلایەکی دیکەوە، سوپای کوەیت ڕایگەیاند کە بەرگری ئاسمانییان ڕووبەڕووی هێرشی مووشەکی و درۆنی بووەتەوە، وەزارەتی ناوخۆی بەحرەینیش داوای لە هاوڵاتییان کردووە خۆیان لە شوێنی پارێزراو بگرن.
ئەم گرژییانە لە کاتێکدایە کە هەوڵەکانی دیپلۆماسی بۆ ڕاگرتنی ئاڵۆزییەکان لە گەرووی هرمز بەهۆی ناکۆکی لەسەر بەڕێوەبردنی ڕێڕەوە ئاوییەکان و هەڵوەشاندنەوەی بڕیاری هەڵگرتنی سزا نەوتییەکان لەلایەن واشنتنەوە، ڕووبەڕووی کۆسپ بووەتەوە. حکومەتی ئێران جەخت لەوە دەکاتەوە کە ڕێڕەوی ئاویی هرمز دەبێت بەپێی ئەو نەخشەیە بەڕێوەبچێت کە ئەوان دیارییان کردووە، هەڵوێستێک کە لەلایەن ئەمریکا و هاوپەیمانەکانیەوە بە "قبوڵنەکراو" ناوزەد کراوە.