حکومەتی بەریتانیا لە کاردانەوە بەرامبەر بە لێدوانەکانی بنیامین نەتانیاهۆ کە بەریتانیای وەک «کۆماری ئیسلامیی بەریتانیا» وەسف کردبوو، هەڵوێستێکی توندی راگەیاند و، وتەبێژێکی حکومەتی بەریتانیا ئەم لێدوانانەی بە "تەواوی قبووڵنەکراو" ناوبرد و ڕایگەیاند کە ئەم بابەتە لەگەڵ حکومەتی ئیسرائیلدا تاوتوێ کراوە.
ئاوێنە: بنیامین نەتانیاهۆ ئەم قسانەی لە چاوپێکەوتنێکدا لەگەڵ پۆدکاستێکی ڕادیۆی سوپای ئیسرائیلدا خستە ڕوو و لە بەشێکیدا بە گاڵتەوە وتی بەریتانیا "یەکەم کۆماری ئیسلامیی پڕچەککراو بە چەکی ئەتۆمییە".
هەروەها سەرۆکوەزیرانی ئیسرائیل لە میانی ئەم چاوپێکەوتنەدا، ستایشی ڕاندۆڵف چەرچڵ، کوڕی وینستۆن چەرچڵ، سەرۆکوەزیرانی پێشووی بەریتانیای کرد بەهۆی ڕووماڵە ئەرێنییەکانی بۆ بەرژەوەندی ئیسرائیل لەکاتی جەنگی شەش ڕۆژەی ساڵی ١٩٦٧دا.
نەتانیاهۆ وتوشیەتی "ئێستا هەوڵ بدەن شتێکی وا لە شوێنێکدا بدۆزنەوە کە پێی دەڵێن کۆماری ئیسلامیی بەریتانیا".
پێشکەشکاری بەرنامەکەش لە درێژەدا وتی "مەگەر ئێستا هەموو ئەوروپا ئاوای لێ نەهاتووە؟".
نەتانیاهۆ لەبەرامبەردا رایگەیاند "بەڵێ، بەڵام کەسێک وتبووی یەکەم کۆماری ئیسلامیی پڕچەککراو بە چەکی ئەتۆمی، کۆماری ئیسلامیی بەریتانیای مەزن دەبێت".
سەرۆکوەزیرانی ئیسرائیل ئاماژەی بەوەشدا، "بۆیە ئێمەش دڵنیا دەبینەوە کە لێرە، لە ئێران، دووەمیان دروست نەبێت".