پنتاگۆن ڕایگەیاند، لە جەنگی دژ بە ئێران ١٨ سەربازی ئەمریکی کوژراوە و ٧٥٧ـى دیکە برینداربوون، ئەم ئامارانە دوای ئەوە دێن کە ڕەخنە ئاڕاستەی پنتاگۆن کرا بەھۆی سڕینەوەی چوار حاڵەتی کوژران و دەیان بریندار.
ئاوێنە: وەزارەتی جەنگی ئەمریکا (پنتاگۆن) سەبارەت بە ژمارەى سەربازە کوژراو و بریندارەکانى وڵاتەکەى لە جەنگی دژى ئێران، ڕاگەیاندراوێکى بڵاوکردەوە، کۆی گشتیی زیانە گیانییەکان لە سەرەتای دەستپێکردنی ئۆپراسیۆنەکانەوە لە ٢٨ـى شووباتەوە ١٨ سەربازی ئەمریکی کوژراوە و ٧٥٧ سەربازی دیکە برینداربوون.
مانگی ڕابردوو، وەزارەتەکە پۆلێنێکی نوێی بە ناوی “ئۆپەراسیۆنەکانی دەرەوە” دامەزراند، بۆ تۆمارکردنی کوژراو و بریندارەکانی ئەو ئۆپراسیۆنانەی لە ٧ـی تەمووزەوە دەستیان پێکردووە، بێ ئەوەی وردەکاری زیاتر سەبارەت بە سروشتی ئەم ئۆپراسیۆنانە یاخود شوێنی برینداربوونەکان بخاتەڕوو.
ئەم ئامارانە دوای ئەوە دێن، کە ڕەخنە ئاڕاستەی پنتاگۆن کرا بەھۆی سڕینەوەی چوار حاڵەتی گیانلەدەستدان و دەیان بریندار پێش ئەوەی دواتر بگەڕێنرێنەوە، وەزارەتەکەش هۆکاری گۆڕانکارییەکانی بۆ “تێکچوونی لە زانیارییەکاندا” گەڕاندەوە.