سەندیكای پزیشكان رەخنە لە بڕیاری داخستنی نۆڕینگەكان دەگرێت
  2020-08-03       277       

سەندیکای پزیشکانی کوردستان رایگەیاند، بەشێک لە بڕیارەکانی ئەنجومەنی باڵای روبەڕوبونەوەی کۆرۆنا "نازانستی و ناواقعین" و لەگەڵ رێنماییە زانستییە جیهانییەکاندا یەک ناگرنەوەو هیچ سودێکی ئەوتۆ بە رێگریکردن لە ڤایرۆسەکە ناگەیەنن و دەبنە بارگرانی ماددی لەسەر هاوڵاتییان.

ئاوێنە: سەندیکای پزیشکانی کوردستان لەبارەی بڕیاری داخستنی نۆرینگەکانەوە رایگەیاند"ئێوارەی ئەمڕۆ ٣\٨\٢٠٢٠ ئەنجومەنی باڵای روبەڕوبونەوەی کۆرۆنا، کۆمەڵێک رێنوێنی نوێی روبەروبونەوەی کۆرۆنای بڵاوکردەوە، تیایدا بڕیاری داوە نۆرینگە و سەنتەر و کۆمەڵگە فەرمییەکان بۆ ماوەی ١٤ ڕۆژ دابخرێن، بەبێ ئەوەی بۆ سەندیکاکان بگەڕێنەوە."

ئەوەش خراوەتەڕو"بەشێکی رێنوێنییەکان نازانستی و ناواقعین و لەگەڵ ڕێنوێنییە زانستییە جیهانییەکان یەک ناگرنەوە کە هیچ سودێکی ئەوتۆی رێگریکردن لە ڤایرۆسەکە ناگەیەنێت و دەبێتە بارگرانی ماددی لەسەر هاوڵاتییان."

باس لەوەشکراوە، "بە تایبەتی کە ئێستا زۆربەی نەخۆشخانە گشتییەکان لە شاری هەولێر داخراون، تاکە دەلاقە بۆ هاوڵاتیان، کلینیکە تایبەتەکانن کە چارەسەرو دەستنیشانی کۆرۆنا و نەخۆشیەکانی تر دەکەن."

ئاماژە بەوەشکراوە، "بەداخستنی کلینیک و سەنتەرەکان وادەکات قەرەباڵغییەکی زۆر لەسەر ئەو بەشەی نەخۆشخانەکان کە ماونەتەوە دروست ببێت و بەرکەوتن زیاتر دەبێت."

‎ئەوەش خراوەتەڕو"وەک سەندیکای پزیشکانی کوردستان، داوا دەکەین بە بڕیارەکەدا بچنەوەو ئەو تێبینییانەی سەندیکاکان بەهەند وەربگیرێن و داوا لە پزیشکانی بەڕێزیش دەکەین تا رۆژی شەممەی داهاتو کلینیک و سەنتەرەکان بەداخراوی بهێڵنەوە، لە ڕۆژی شەممە ٨\٨\٢٠٢٠ کلینیکەکانیان بەشێوەی ئارەزومەندانە دەتوان بۆ خزمەتی هاوڵاتیانی بکەنەوە."

ئەوەش لە کاتێدایە، ئێوارەی ئەمڕۆ وەزارەتی ناوخۆ رایگەیاند، "بڕیاردراوە بە داخستنی گشت سەنتەر و نۆرینگەکان (پزیشکان، پزیشکانی ددان، کارمەندانی تەندروستی، تاقیگەیی) بۆ ماوەی ١٤ رۆژ."

 

زۆرترین بینراو
© 2020 Awene Online, Inc. All Rights Reserved.
×