كەجەكە پەیامێك ئاڕاستەی كونسوڵخانەكانی وڵاتانی رۆژئاوا لە هەولێر دەكات
  2021-06-14       1140       

کۆمیتەى پەیوەندییەکانی دەرەوەی كۆما جڤاكێن كوردستان(کەجەکە) پەیامێك ئاڕاستەی نوێنەرایەتی و کۆنسوڵخانەكانی وڵاتانی ڕۆژئاوا لە هەولێر دەكات و داوادەكات، لەبارەی "زانیارییە تاکلایەنە و تێکدەرەکان"ی پارتی و توركیا سەبارەت بە پەکەکە، "هۆشیار بن."

ئاوێنە: کۆمیتەى پەیوەندییەکانی دەرەوەی کەجەکە، ئەمڕۆ دوشەممە، لەبارەی پێشهاتەکانی ئەم دواییە پەیامێكی بۆ نوێنەرایەتی و کۆنسوڵخانەكانی وڵاتانی دەرەوە لە هەولێر نارد.

کەجەکە لە پەیامەكەیدا وتویەتی"زانیارییە تاکلایەنەکانی پارتی دیموکراتی کوردستان و دەوڵەتی تورک لەسەر پەکەکە هەڵە و لایەنگرانەن." و داوایکردوە، لەوبارەیەوە "هۆشیار و هەستیار بن."

کەجەکە باسی قڕکردن و پاکتاوکردنی دژی کوردانی کردوە، کە بە درێژایی مێژو تا حکومەتی ئێستای توركیا بەردەوامیی هەیە.

کەجەکە سەرنجی خستۆتەسەر ئەوەش، کە ئامانجی سەرەکیی دەوڵەتی تورک لەناوبردنی دەستکەوتەکانی کوردە و ڕەخنەی لە وڵاتە ئەوروپییەکان گرتوە، کە "بەهۆی بەرژەوەندیی خۆیانەوە پشتیوانی لەو سیاسەتە دەکەن."

لە پەیامەكەیدا باسی روداوەكەی مەتینای كردوەو تێیدا ئەوەی خستۆتەڕو"پارتی هێزی ناردوەتە ناوچەیەک کە 25 ساڵە گەریلا لەو ناوچەیەدایە." وتوشیەتی"لە ڕاگەیاندراو و لێدوانەکانی پارتی دیموكراتی كوردستاندا لەبارەی ئەو پێشمەرگانەى ژیانیان لە دەستداوە پەکەکە تاوانبار دەکرێت، بەڵام ئەوە ڕاست نییە."

وتوشیەتی"ئەو ڕاگەیەندراو و لێدوانانە ئاڵۆزیی نێوان گەلی کورد زیاتر دەکەن."

کەجەکە داوای لە کۆنسوڵخانەکان و نوێنەرانی وڵاتانی ڕۆژئاوا لەهەولێر کردوە، کە لەبارەی ئەو بابەت و زانیارییە "لایەنگرانە و تێکدەرانانە هەستیار بن و لە بەرامبەر جوڵەى داگیرکاری، کە لەدژی یاسا نێودەوڵەتییەكانە بە ڕۆڵ و ئەرکی خۆیان هەستن."

کەجەکە لە کۆتایی پەیامەكەیدا داوای لە کۆمەڵگەى نێودەوڵەتی كە "دەبێت لە بەرامبەر داگیرکەریی ئەردۆغان بوەستنەوە و دەوڵەتى تورک رابوەستێنرێت و ڕێگا بە سەپاندنی خەونی عوسمانیی نوێی دەوڵەتی تورک نەدەن."

زۆرترین بینراو
© 2021 Awene Online, Inc. All Rights Reserved.
×