سه‌رۆكى فراكسیۆنى پارتى دیموكراتى كوردستان له په‌رله‌مانى عێراق رایگەیاند، له ماوه‌ى داهاتودا به‌پێى رێكارى یاسایى، هه‌وڵى خۆیان ده‌ده‌ن و كار ده‌كه‌ن بۆ گه‌ڕانه‌وه‌ى دو كورسیى په‌رله‌مانى فراكسیۆنى پارتى له نه‌ینه‌واو هه‌ولێر.
ئاوێنە: ڤیان سه‌برى، ئەمڕۆ شەممە، بە ماڵپەڕی رەسمی حزبەكەی راگەیاند"ئێستا وه‌كو پارتى به‌پێى ده‌ستور ده‌توانین تانه پێشكه‌ش بكه‌ین بۆ گه‌ڕانه‌وه‌ى دو كورسیى فراكسیۆنى پارتى له نه‌ینه‌وا و هه‌ولێر."
وتوشیەتی"بۆیه ئێستا كار ده‌كه‌ین و هه‌وڵده‌ده‌ین بۆ وه‌رگرتنه‌وه‌ى ئه‌و دو كورسییه به‌شێوه‌یه‌كى یاسایى له دادگاى فیدڕاڵى، چونكه مافى خۆمانه‌‌و ده‌ستوریش رێگاى داوه كه رێكارى یاسایى بگرینه به‌ر".
بەپێی ئەنجامە سەرەتاییەكانی هه‌ڵبژاردنى 10-10-2021ى ئه‌نجومه‌نى نوێنه‌رانى عێراق، پارتى 33 كورسی هێنابو، بەڵام به بڕیارى ده‌سته‌ى دادوه‌رىی كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق، 2 كورسى پارتی له پارێزگاى هه‌ولێر و نه‌ینه‌وا، كه‌م كرانه‌وه بۆ بەرژەوەندی یەكێتیی نیشتمانیی كوردستان.