قەرەقۆزه‌كانی میدیا
ئارەزو نوری
2020-05-09 801
میدیای کوردی هێندەی کەسانی بێ ئەزموون و قه‌ره‌قۆز (موهەریج) و ناشارەزا بەڕێوەی دەبەن و کۆمەڵگە بەلاڕێدا دەبەن هێندە میدیاکاری بەئەزموون و قسەزان و خەمخۆری میللەت نابینرێت..
بەرنامەی (گفتوگۆی کچان)ی کەناڵی رووداو یەکێک لەو کارە هەرە قێزەوەن و بێ کەڵکانەی نێو میدیای کوردی، کە هیچ سوودێکی زانستی و مەعریفی تێدا نیە و بەرنامەیەک بۆ سووکایەتی بە نەسلی کچان و ژنان و سەرقاڵکردنی خەڵکی بەو دانیشتنە هەرە پڕ گاڵتەجاڕانەی سێ بەناو میدیاکاری ناشارەزا بەڕێوەی دەبەن..
ئایا هەڵبژاردنی میدیاکارێکی شارەزاو سەرکەوتوو بۆ پێشکەشکردنی بەرنامەیەکی سەرکەوتوو هێندە ئەستەمە؟ یا تەنها بۆ سواڵی بینەر و لایک و کۆمێنت هەر کەسێک ئامادەبێت رۆڵی موهەریج ببینێت و خۆی بکات بەگاڵتەجاڕی بینەرو سۆشیال ئیدی بۆ سەر شاشە شیاوەو چش لەوەی چ ژەهرێک و عەقڵیەتێک میوانی ماڵەکان دەبێ؟!
بچوککردنەوه‌ی دۆزی کچان و ژنان لەچوارچێوەی تەوەرە ساویلکەکانی نێو ئەم بەرنامەیە لەلایەن سێ خاتوون سوکایەتییەکی قێزەونە و ناکرێ بەردەوامبن.. ئەوان هەرچەندە هیچ شارەزاییەکیان لەبواری میدیادا نیە و شاشە بە سێرک تێگەشتوون، بگرە زمانێکی زۆر بازاڕییانە بەکاردێنن و بەو تەوەرانەی تەنها شاشەیان پێ پڕکردووەتەوە و گفتوگۆی نێوان خۆیانە بەتەنها نەک کچان بەگشتی، خۆیان چ بیرکردنەوەو چۆن ژیانێکیان ئەوێ هەر ئەوە باسەکەیە.
بەجدی پێویستبوو کەناڵی رووداو بۆ بیرۆکەی بەرنامەکە کەسانی بەئەزموون و شارەزا هەڵبژێرێ و تاوتوێی پرسە هەستیار و کێشەکان و چۆنیەتی چارەسەر بدەن و سوودێک بگەیەننە وەرگر، بە پێچەوانەی ئەم بەرنامەیە کە سەرتاپا سووکایەتی و گاڵتەجاڕییە و هیچ سوودێکی ئەوتۆی نیە.
گرنگە میدیاکار بزانێ چ تەوەرێک هەڵدەبژێرێ و کێ بانگێهشتی تاوتوێ کردنی دەکات، بەڵام پێشکەشکارەکان هێندە ناشارەزان کە لەبەر هات و هاوارو هەڵاو دەنگبەرزی خۆیان و پێکەنین و تەنانەت نەبوونی سەنگی کە میوان پێیان بڵێ کچێ دەڕاوەستن قسە بکەم و ئەوانیش حیلکە حیلک بەدەمی پێبکەنن.. بەڕێکردنی تەوەرەکە بەشێوەی تەنزو گاڵتەجاڕ، رێک بووەتە موهەریجخانەو بینەریان بەخۆیان خۆش و سەرقاڵ کردووە.
میوانی بەرنامە هەرچی بێت و هەرکەسێ بێت، پێویستە پێشکەشکار هاوڕێیەتی و گاڵتەوگەپی دەرەوەی ستۆدیۆ وەلا بنێت و پەیامێکی درووست بدەن بە وەرگر..
بەڵام لێرە کە کردوویانە بە چایخانەو (یەڵا شەش بێش یاری بکە) و خۆیان بەو ئاستە دەرخستووە ئیتر چاوەڕێی هەڵسانگاندنێکی چۆنبن؟
بەڵام کە نەخۆشی دەرکەوتن و بەناوبانگبوون لەئارادابوو ئیتر میدیا هەموو بەهایەکی خۆی لەدەست دەدات و دەبێ تەنها خەریکی خۆقاڵکردنبێ بەدەرکەوتنی ئەم جۆرە کەسانەو ئەم ده‌موچاوانه.. ئیتر چی ئەوترێ و چ رەخنەیەکیان لێ ئەگیرێ هەمووی تورێکی قوڕاوی ناهێنێ تا لایکو کۆمێنتیان زۆرتربێت ئەم جۆرە بەرنامانە رەواجی زیاترە.