سەرۆک وەزیرانی عێراق رایدەگەیاند؛ وڵاته‌كه‌ی ئاماده‌یه‌ بۆ دروستكردنی ناوچه‌یه‌كی پیشه‌سازی هاوبه‌ش له‌گه‌ڵ ئێران هاوشێوەی ئه‌و ناوچه‌ پیشه‌سازییه‌ی له‌نێوان عێراق و ئوردندا هه‌یه‌.

ئاوێنه‌: به‌پێی به‌یاننامه‌یه‌كی نوسینگه‌كه‌ی ئه‌مڕۆ دوشه‌ممه‌ عادل عه‌بدولهه‌مدی، سەرۆک وەزیرانی عێراق پێشتوازی كردوه‌ له‌ عەباس عێراقچی، جێگری وەزیری دەرەوەی ئێران و وه‌فدێكی یاوه‌ری.

هێمای بۆ ئه‌وه‌ كردوه‌ كه‌ لە کۆبونەوەیه‌کدا بابه‌ته‌كانی بازرگانی، ئابوریی، ئاو، سنور و ڤیزه‌ له‌ نێوان هه‌ردو وڵات تاوتوێكراوە.

به‌پێی به‌یاننامه‌كه‌ عادل عه‌بدولمه‌هدی ئاماده‌یی عێراقی بۆ دروستكردنی ناوچه‌یه‌كی هاوبه‌شی پیشه‌سازی له‌نێوان عێراق و ئێراندا، هاوشێوه‌ی ئه‌و ناوچه‌ پیشه‌سازییه‌ی له‌نێوان عێراق و ئوردندا هه‌یه‌، نیشانداوه‌.

لای خۆیشییەوە، عەباس عێراقچی، جێگری وەزیری دەرەوەی ئێران باسی له‌وه‌ كرد كه‌ سه‌ردانه‌ چاوه‌ڕوانكراوه‌كه‌ی سه‌ركۆماری ئێران، حه‌سه‌ن روحانی بۆ عێراق په‌یوه‌ندییه‌ بازرگانی و ئابورییه‌كانی نێوان هه‌ردو وڵات به‌هێز ده‌كات.