محەمەد چاوشین/ قەڵادزێ
"یەک فاکتەر ڕۆڵ دەبینێ لەوەی مرۆڤ شکست بێنێت، ئەویش نەبوونی متمانە بەخۆبوونە"."ویلیام جەيمیز"دەروونناسی ناسراوی ئامریکایی.
خدر بێگەڵاسی، لە کوێرە گوندێکی دورە دەستی ناوچەی پشدەر لەدایک بووە، بەڵام ھەنووکە ناو و ناوبانگی ئەو لەسەر زمانی زۆربەی خەڵکی کوردستانە.
بەجل و بەرگ و پێڵاوێکی سادە، بە ستایلێکی تایبەتی سەر و قژ داھێنانەوە، زۆرجار بە سواری دوچەرخەیەک بەناو بازاڕی قەڵادزێدا دێت و دەچێت، لەیەک کاتدا چەند کەسێک بە"مامۆستا"بانگی دەکەن و وێنەی لەگەڵ دەگرن.
ئەو بەھۆی ھونەری گۆڕانی گوتن و شێوەی قسەکردنییەوە، لەناوچە جیاجیاکانی ھەرێمی کوردستانەوە بانگھێشتی کۆڕ و کۆبوونەوەی تایبەتی ھەوادارەکانی دەكرێت، بە گۆرانی و مۆسیقاوە کۆڕی دۆست و ھەوادارەکانی گەرم دەکات و ھەوادارەکانیشی خۆشەویستی و پشتیوانی خۆیان بۆی دووپات دەکەنەوە.
ئێستا مامۆستا"خدر بێگەڵاسی" تەنھا ناوێکی لۆکاڵی نییە لەچوارچێوەی گوندەکەی خۆیدا، بەڵکوو ناو و ناوبانگی ناوبراو بووەتە ناوێکی کوردستانی و بەناو پانتایی و جوگرافیای وڵاتدا بڵاو بۆتەوە!.
خدر بێگەڵاسی دەیگوت:
"ناوبانگ پەیداکردن چێژی خۆی ھەیە، ھەرکەسێک ئەگەر متمانەی بەخۆی بێت دەتوانێ ناوبانگ پەیدا بکات، بەڵام بۆ ھەموو شتێک ھەوڵ و کۆشش و ھەنگاونانە".
مامۆستا خدر بێگەڵاسی جیا لەوەی کاری ھونەری دەکات و لەو نێوەشدا ئەستێرەی بەختی بەرەو ھەڵکشانە، ھاوکات لە قسەکردنیشدا زۆر ورد و شارەزایە.
ھەمیشە بەدوای ووشەی تەواو کوردیدا دەگەڕێ و زمان پاراو و شیرینە.
ئەو دەیگوت:
"چەندین گەنج دەناسم خەونی جۆراوجۆریان ھەیە، بەڵام بەشێوەی عەمەلی بەدوای بەدیھێنانی خەونەکانیانەوە نین و تەنھا خەون دەبینن!، خەون و خەیاڵ ئەگەر ماندوبوونی بۆ نەچێژیت ناتوانی بەدەستیان بێنیت".
"ناوبانگ بە خەون و خەیاڵ و دانیشتن پەیدا نابێت، دەبێ بۆی ماندوو بیت و متمانەی تەواوت بەخۆت ھەبێت". خدر بێگەڵاسی وایگوت.
قسەکانی "خدر بێگەڵاسی" بۆمن جێی سەرنج بوون، لێرەدا قسەیەکی بەناوبانگی گەورە دەرونناسی ئەمریکی"ویلیام جەیمیز"م بیرکەوتەوەوە. جەیمیز دەڵێت:
"یەک فاکتەر ڕۆڵ دەبینێ لەوەی مرۆڤ شکست بێنێت، ئەویش نەبوونی متمانە بەخۆبوونە".
بەڵێ، متمانە بەخۆبوون ھەنگاوی یەکەمە، شکست و سەرکەوتنەکانت بە"متمانەبەخۆبوون"ەوە گرێدراوە.
خدر بێگەڵاسی تەنھا خۆیەتی و ھیچ لەشکر و خێڵ و عەشیرەتی بەدەورەوە نییە، حیزب و کۆمپانیاشی نییە بۆ ئەوەی پارەی خەیاڵی و موفتەی لەبەردەمدا ھەڵڕێژن!.
ئەو تەنھا ھەستی متمانە بەخۆبوونی ھەیە و باوەڕی بەخۆیەتی.
مامۆستا خدر لەوبارەوە دەیگوت:
"ئەمن ناڵێم خاوەنی ناو و ناوبانگم، بەڵام ئەگەر قەراربێ خەڵکانێک لە کوردستان بمان ناسن، ئەوە پەیوەندی به دوو شتی سەرەکییەوە ھەیە، یەکەم متمانەم بەخۆم ھەیە و دووەمیش پشتیوانی مەعنەوی خەڵکە".
ناوبراو ئەوەشی گوت:
"متمانە بەخۆبوون و پشتیوانی خەڵک، دوانەیەکی لێک گرێدراون لاى من، ھیواکانیشم بۆ داھاتوو لەسەر ئەو دوو کۆڵەکەیە ھەڵدەچنم".
لەکۆتاییشدا، مامۆستا خدر بێگەڵاسی سپاسی ئەو لەشکرە زۆر و زەوەندەی لایەنگرانی دەکات کە لەناوچە جیاجیاکانی کوردستان و دەرەوەشدا، پشتیوانی کارەکانی دەکەن و ھانی دەدەن.
ئەو دەڵێت:
"بەھەموو شێوەیەک پارێزگاری لەو متمانەیە دەکەم کە لایەنگرەکانم بەمنیان ھەیە، بەشێکی گەورەی بوونی من ئەو جەماوەرەیە کە وەکوو کێوێک لەپشتمەوە وەستاون".