"مرۆڤ‌و خودا - کۆتایی ململانێکان" بڵاودەبێتەوە
  2019-05-03       833       

"مرۆڤ‌و خودا - کۆتایی ململانێکان"، نوێترین کتێبی "فوئاد سدیق"ی نوسەرە، کە وەک خۆی دەڵێ "دوای بگرەو بەردەیەكی زۆر لە وەزارەتی رۆشنبیریی ژمارەی سپاردنی پێ نەدەدراو بەهەوڵی بەڕێوەبەری گشتی كتێبخانەكان و راوێژكاری یاسایی مەسعود مستەفا توانرا وەزارەتی رۆشنبیری بێبەریبوونی خۆی لە بەرپرسیارەتی ئەم كتێبە بەدور بگرێ".

نوسەر لەم کتێبەیدا تیشک دەخاتە سەر ئەوەی لەو رۆژەوەی هزری ئەقڵانییەت لە سەدەی هەژدە گەشەی زۆری بەخۆیەوە بینی، بەتایبەت لە بواری عەلمانییەت و گومانكردن (العلمانی والتشكیكی) لە فەرەنساو ئینگلتەرا ، ئیتر ئایین تووشی چەقبەستن هات، چونكە ئیتر ئایین نەیدەتوانی وەڵامی ئەو هەموو پرسیارە گرنگ و زانستیانە بداتەوە، كە پەیوەندییان بە سروشت و زانست و كاروباری ژیانی خەڵكەوە هەیە. چونكە هەموو ئەو تەرزە هزرو بۆچوون و بیرۆكانەی كە پەیوەندییان بە دوارۆژو غەیبانییەت و رۆح و ، خرانە بەر مایكرۆسكۆبی ئەقڵانییەت  و، ئیتر ئاستی وشیاری نوخبەی ئەوكات و ئاستی پێشكەوتنی كۆمەڵایەتی ئەم دوو وڵاتە بە دیاریكراوی، وای كرد پرسیاری گەورە بخەنە سەر ئایین و ئەم قۆناخە تێبپەڕێنن.  
 هەروەها ئەم کتێبە جەغت لەوە دەکات کە ئایین لە بنەڕەتدا بریتییە لە میتافیزیك، واتا ئایین  هەموو سنوورەكانی ئەقڵی زانستیی مرۆڤ تێدەپەڕێنێت، تا دەگاتە ئەو ئاستەی مرۆڤ لەبەرامبەریا لە مۆلەق بوەستێت و چوارچێوەیەكی ئەفسوونی، سیحر، غەیبانی، مەتەڵئامێزی بۆ بەباڵادا دەبڕێت و ئیتر مرۆڤیش لە بەرامبەریا دەستەوەستان دەمێنێتەوە. ئایین جۆرە بیركردنەوەیەكە واتلێدەكات لە هەموو ئەو توانا ئەقڵی و بیركردنەوە زانستیانەت پەشیمان ببیتەوە كە وەدیتهێناوە، چونكە ئەقڵی مرۆڤ سنووردارەو نەگەیشتۆتە ئەو ئاستەی دیوە نەزانراوو غەیبانییەكان شیبكاتەوە.    
  ئەم كتێبە تیئۆرییە كە قەبارەكەی 340 لاپەڕەییەو لەبڵاوکراوەکانی ئایدیایە، هەوڵێكی ئەكادیمیانەی جدییە، لە سەرەتای ژیانی مرۆڤایەتییەوە تا ئەوكاتەی مرۆڤ توانای بیركردنەوەی هەبووەو بیری لەوە كردۆتەوە كە خودایەك دروستبكات و بیپەرستێ وەك پەناگەیەكی ئارام بۆ خۆی  تا ئەوكاتەی هەر سێ ئایینە ئاسمانییەكان بڵاوبوونەتەوە، ئیتر بە وردی ئەوەی خستۆتە روو كە  وشەی خودا لە كوێوە سەرچاوەكەی وەرگرتووەو كێ بوو یەكەمین كەس ئەم وشەیەی بەكار هێناو ....ھتد بە كورتی لە میانی خوێندنەوەی ئەم كتێبە زۆر راستی كە شاردرابوونەوە خۆیان زەق دەكەنەوەو مرۆڤ دەخاتە ناو لێكدانەوەیەكی زۆر جیاوازتر لە پێشووتری، بۆیە خوێندنەوەی ئەم كتێبە زۆر پێویستە ، چونكە بە كتێبێكی زۆر گرنگ دادەنرێ كە بنەمایەك بێت بۆ رۆشنگەری و ئەقڵانیەتی  كوردی.

 

زۆرترین بینراو
© 2018 Awene Online, Inc. All Rights Reserved.
×