وەزارتی بەرگری توركیا، ئەمڕۆ دوشەممە، ئاشكرایكرد كە وەفدێكی ئەمریكی گەیشتونەتە پارێزگای ئورفە لە باشوری توركیا لەپێناو ئامادەكاری بۆ دامەزراندنی ناوەندی ئۆپەراسیۆنی هاوبەشی پەیوەست بەو ناوچە ئارامەی بانگەشەی دروستكردنی دەكرێت لەسوریا.

ئاوێنە: وەزارەتی بەرگری توركیا، لەبەیاننامەیەكدا رایگەیاند، كارەكانی دامەزراندنی ناوەندی ئۆپەراسیۆنی هاوبەش لەپەیوەست بە ناوچەی ئارامی پلان بۆدانراو لە باكوری سوریا بە هەمانەهگی لەگەڵ ئەمریكا، دەستیان پێكرد.

لەبەیاننامەكەدا هاتوە"لەو چوارچێوەیەدا، وەفدێكی ئەمریكی پێكهاتو لە شەش كەس گەیشتنە ئورفە بەمەبەستی ئامادەكارییە سەرەتاییەكان."

ئەوەشی خستۆتەڕو"بڕیارە كارەكانی ناوەندی ئۆپەراسیۆنی هاوبەش لە چەند رۆژی داهاتودا دەست پێ بكات."

ئەوەش لەكاتێكدایە كە لە گفتوگۆكانی هەفتەی رابردودا توركیاو ئەمریكا گەیشتنە رێككەوتن لەسەر دامەزراندنی ناوەندێكی ئۆپەراسیۆنی هاوبەش بۆ ئیدارەدانی ناوچەی ئارام لە باكوری سوریا هەرچەند لەسەر وردەكارییە سەرەكییەكانی تایبەت بە ناوچەی ئارام لەوانە روبەرەكەی و پێكهاتەی دەورییە هاوبەشەكان رێكنەكەوتون.

ناكۆكی لەنێوان ئەنكەرەو واشنتۆندا هەیە لەسەر پلانی پەیوەست بە باكوری رۆژهەڵاتی سوریاوە كە لەوێ ویلایەتە یەكگرتوەكانی ئەمریكا لەگەڵ یەكینەكانی پاراستنی گەل(یەپەگە) هاوپەیمانە بۆ شكستپێهێنانی داعش، لەكاتێكدا توركیا یەپەگە بە "دوژمن" و بە "رێكخراوی تیرۆریستی" لە قەڵەم دەدات.

هەروەها تا ئێستاش توركیاو ئەمریكا لەسەر روبەری ئەو ناوچە ئارامەی بڕیارە دروست بكرێت رێكنەكەوتون بەشێوەیەك توركیا دەیەوێت روبەرەكەی زیاتر لە 30 كلیۆمەتر دەبێت لەكاتێكدا ویلایەتە یەكگرتوەكانی ئەمریكا پێی وایە دەبێت بەلایەنی زۆرەوە نیوەی ئەوە بێت