کەمێک پێش ئێستا زاهید مەحمود باوکی شەهید سورکێو ناسراو بە شێخ زاهید، لە شاری سلێمانی بەهۆی نەخۆشییەوە کۆچی دوایی کرد.
ئاوێنە: ناوبراو لە ساڵی 1949 لە گوندی زیۆمەری ناوچەی قەرەداغ لەدایکبووە و لە ساڵی 1962 بووەتە پێشمەرگەی شۆڕشی ئەیلول و تاوەکو ساڵی 1970 لە پێشمەرگایەتی بەردەوامبووە.
رۆژی 17ی شوباتی ساڵی 2011 لە سلێمانی خۆپیشاندانی هاوڵاتییان دەستیپێکرد و خۆپیشاندەران لەبەردەم لقی چواری پارتی دیموکراتی کوردستان گردبوونەوە، دواتر گرژی کەوتە نێوان خۆپیشاندەران و پاسەوانانی بارەگاکە و بەوهۆیەشەوە 10 خۆپیشاندەر کوژران کە یەکێکیان سورکێوی کوڕی شێخ زاهید بوو، هاوکات ژمارەیەکی زۆری دیکەش بریندار بوون.
لەدوای رووداوەکە شێخ زاهید بەردەوام لە زۆرینەی گردبوونەوە و خۆپیشاندانەکاندا بەشداری دەکرد و سووربوو لەسەر ئەوەی ناوی بکوژی کوڕەکەی ئاشکرا بکرێت و دەستگیربکرێت.