بافڵ تاڵەبانی، سەرۆكی یەكێتیی نیشتمانیی كوردستان سەردانی ئەدهەم بارزانی بارزانی كردو لە كۆبونەوەیەكدا جەختیان لە "سەرخستنی هەوڵە نیشتمانییەكان كردەوە بە ئاڕاستەی بەدیهێنانی گۆڕانكاری لە پڕۆسەی حوكمڕانی."
ئاوێنە: نوسینگەی سەرۆكی یەكێتیی نیشتمانیی كوردستان، ئەمڕۆ دوشەممە، لە راگەیەندراوێكدا وتی، بافڵ تاڵەبانی، لە سلێمانی و لە ماڵەكەی خۆی سەردانی ئەدهەم بارزانی كرد.
وەك لە راگەیەندراوەكەدا هاتوە، لە كۆبونەوەی نێوانیاندا "دۆخی هەرێمی كوردستان و پرسی هەڵبژاردنی پەرلەمانی كوردستان تاوتوێكران و دوپات لە سەرخستنی هەوڵە نیشتمانییەكان كرایەوە بە ئاڕاستەی بەدیهێنانی گۆڕانكاری لە پڕۆسەی حوكمڕانی و زیاتر خزمەتكردنی هاونیشتمانییان."
بەپێی راگەیەندراوەكە، بافڵ تاڵەبانی لەبارەی دوایین پێشهات و هەنگاوەكان بۆ ئەنجامدانی هەڵبژاردنێکی "بێگەرد" رایگەیاند، "پێویستە هەمو ئەو هێزو لایەنانەی پەرۆشی سەرخستنی ئەزمونی هەرێمی كوردستان و هێنانەكایەی حوكمڕانییەكی تەندروستن، دژی دواخستنی هەڵبژاردن و دروستكردنی بەربەست لەبەردەم ئەو پڕۆسە گرنگ و دیموكراسییەدا بوەستنەوە."
لە راگەیەندراوەكەدا هاتوە"لەدرێژەی دیدارەكەدا گەشەپێدانی پەیوەندییەكانی هەردولاو یەكخستنی هەوڵە نیشتمانییەكان بە ئامانجی كۆتاییهێنان بە ناكۆكییەكان و پاراستنی مافە دەستورییەكانی گەلی كورد لەچوارچێوەی حكومەتی فیدراڵ جەختی لێكرایەوە."
![](https://scontent.fisu10-2.fna.fbcdn.net/v/t39.30808-6/448143718_1023023635849061_2017442110008990835_n.jpg?_nc_cat=108&ccb=1-7&_nc_sid=5f2048&_nc_eui2=AeH7xTNxKClr_NZTtn8TEg099cXIdW64BHP1xch1brgEc5bLHiDTD0B7tMpZuEJTx-HWV8zFH0CMpofNE4aqPXGQ&_nc_ohc=ZR8nFfyYagoQ7kNvgGYtuMt&_nc_ht=scontent.fisu10-2.fna&oh=00_AYCb0sIZTMMiL-Fx77r9otVo4YKlFuxPhUvWg4STuqF4EA&oe=666CEA79)