له‌هێرشێكی بێ پێشینه‌دا، له‌چه‌ند ناوچه‌یەکی لوبنان زنجیره‌یه‌ك تەقینەوە لەئامێری بێتەلی -پەیجەر- ئەندامانی حیزبوڵا ڕویداو به‌هۆیه‌وه دەیان ئەندامی ئەو حزبە برینداربون. هاوكات ئاژانسی هەواڵی میهری ئێرانی ئاماژەی بەوە کردووە، موجتەبا ئەمینی، باڵیۆزی ئێران لەلوبنان بەهۆی ئەو تەقینەوانەوە بریندار بووە.
ئاوێنه: ئاژانسه‌كانی هه‌وڵ بڵاویانكرده‌وه، دوای نیوه‌ڕۆی ئه‌مڕۆ سێشه‌ممه، له‌چه‌ند ناوچه‌یەکی لوبنان زنجیره‌یه‌ك تەقینەوە رویاندا، ئیسرائیل له‌ڕێگه‌ی ئامێری بێتەلی پەیجەر كه له‌لایه‌ن ئه‌ندامان‌و چه‌كدارانی حیزبوڵای لوبنانه‌وه به‌كارده‌هێنرێت، هێرشێكی ئەلیکترۆنیی بۆ سه‌ر حیزبوڵا ئه‌نجامداو به‌هۆیه‌وه دەیان ئەندامی ئەو حزبە برینداربون.
بەپێی ئاژانسی هەواڵیی لوبنان، تەقینەوەکان لەباشوری بەیروت کە بەشوێنی سەرەکیی چەکدارانی حیزبوڵا دادەنرێت و ژمارەیەک ناوچەی دیکەی لوبنان ڕویانداوە.
ئاژانسی هەواڵیی لوبنان ده‌ڵێت، هه‌واڵگری ئیسرائیل دزەیکردۆتە ناو ئامێره بێتەله‌كانیان كه ئامێرێكی بچوكه‌و بۆ په‌یوه‌ندی به‌كار دێت.
لەراگەیه‌ندراوەکەی ئاژانسی هەواڵیی لوبناندا هاتووە، دەیان بریندار بەهۆی تەقینەوەکەوە گواستراونەتەوە نەخۆشخانە.
هاوكات ئاژانسی هەواڵی میهری ئێرانی ئاماژەی بەوە کردووە، موجتەبا ئەمینی، باڵیۆزی ئێران لە لوبنان بەهۆی ئەو تەقینەوانەوە بریندار بووە.
سەرچاوەیەکی نزیک لەحیزبوڵای لوبنان بەئاژانسی فرانس پرێسی وتووە، هه‌واڵگری ئیسرائیل توانیویه‌تی دزەبکاتە ناو ئامێره‌كانی په‌یوه‌ندیی ئه‌ندامانیان.