ئەردۆغان: تاوتوێی هەڵپەساردنی پەیوەندییە دیپلۆماتییەكانمان لەگەڵ ئیمارات دەكەین
  2020-08-14       425       

رەجەب تەیب ئەردۆغان، سەرۆك كۆماری توركیا، ئەمڕۆ هەینی، رایگەیاند: ئەنكەرە تاوتوێی كشاندنەوەی باڵیۆزی خۆی لە ئەبوزەبی و هەڵپەساردنی پەیوەندییە دیپلۆماتییەكانی لەگەڵ ئیمارات دەكات، ئەوەش دوای رێككەوتنی ئیمارات لەگەڵ ئیسرائیل بۆ ئاساییكردنەوەی پەیوەندییەكانیان.

ئاوێنە: شەوی رابردو، ئیسرائیل و ئیمارات رێككەوتنیان لەسەر ئاسایی كردنەوەی پەیوەندییەكانی نێوانیان بە نێوەندگیری ئەمریكا راگەیاندو رێككەوتنەكەش لەسەر ئاستی ناوچەكەو جیهان كاردانەوەی جیاجیای لێكەوتەوەو دەسەڵاتدارانی فەلەستین بە "خەنجەردان لە پشتی دۆزی فەلەستین" ناویان برد. 

ئەردۆغان، ئەمڕۆ هەینی سەبارەت بە رێككەوتنەكە بە رۆژنامەنوسانی راگەیاند، توركیا دژبەو رێككەوتنە رەنگە باڵیۆزی وڵاتەكەی لە ئەبوزەبی بكشێنێتەوە یاخود پەیوەندییە دیپلۆماتییەكانی لەگەڵ ئیمارات هەڵپەسێرێت و بۆ ئەوەش فەرمانی بە وەزیری دەرەوەی توركیا داوە.

پێشتریش وەزارەتی دەرەوەی توركیا رێككەوتنەكەی بە "رەفتارێكی دوڕوانە"ی ئیمارات ناوبرد.

ئەوەش لەكاتێكدایە كە توركیا خۆی پەیوەندی دیپلۆماتی و بازرگانی لەگەڵ ئیسرائیل هەیە، بەڵام ماوەی چەند ساڵێكە پەیوەندییەكانیان گرژی تێكەوتوە.

ئیمارات دەبێـە سێیەم وڵاتی عەرەبی كە پەیوەندییەكانی بەتەواوەتی لەگەڵ ئیسرائیل ئاسایی دەكاتەوە ئەوەش دوای میسر لە ساڵی 1979 و ئوردن لە ساڵی 1994.


زۆرترین بینراو
© 2021 Awene Online, Inc. All Rights Reserved.
×