پارێزگاری هەولێر، ئێوارەی ئەمڕۆ یەكشەممە، ئاماری روداو، تاوان و
گەشتوگوزاری لە رۆژانی جەژندا ئاشكراكردو دەشڵێت: ئەو پلانەی لەلایەن لیژنەی ئەمنی
پارێزگاكەوە بۆ رۆژانی جەژن ئامادەكرابو بەسەركەوتویی جێبەجێ كرا.
ئاوێنە: نوسینگەی پارێزگاری هەولێر، لە راگەیەندراوێكدا سەبارەت بە ئامارەكانی
تاوان لە هەولێر لەسێ رۆژی جەژندا وتویەتی، (78) تاوان تۆمارکراون،
(73) تاوان ئاشکراکراوە و تاوانباران دەستگیرکراون، (5) تاوانیش لە ژێرلێکۆڵینەوە
دان.
هەروەك بەپێی راگەیەندراوەكە لە رۆژانی
جەژندا (10) ڕوداوی هاتوچۆ ڕویانداوەو لەئەنجامیاندا (10)
کەس برینداربون و (4) کەسیش گیانیان لەدەستداوە.
ئاماژەی بەوەشداوە كە هەر لەوماوەدا (30) حاڵەتی ئاگرکەوتنەوە
هەبوە لەگەڵ دۆزینەوەی تەرمێک لە مارکێتێکی گەڕەکی 32ی پارک، سەرجەم حاڵەتی ئاگرکەوتنەوەکانیش
لەلایەن تیمەکانی بەرگری شارستانییەوە کۆنترۆڵکراون و جگە لە زیانی ماددی هیچ زیانێکی
گیانیان لێنەکەوتۆتەوە.
سەبارەت بە گەشتوگوزار، نوسینگەی پارێزگاری هەولێر رایگەیاندوە كە پاڵپشت بە
بڕیاری قهدهغهى هاتوچۆ له نێوان بازگەکانی هەرێمی کوردستان و پارێزگاكانی تری
خوار و ناوەڕاستی عێراق به پێى ئهو رێكارانهى كه له بهیانى ژماره (15)ى ساڵى
2021 دیارى كراوه، وەکو خۆی جێبەجێکراوە و ڕێگە بەهیچ
گروپێکی گەشتیاری نەدراوە بێنە هەولێری پایتەخت."
هەر لەو بارەیەوە ئەوەشی خستۆتەڕو"ئەگەرچی ئەوەش
کاریگەری نەرێنی هەبو لەسەر کاروکەسابەتی هاوڵاتییان و شوێنە گەشتیارەییەکانی سنوری
پارێزگاکەمان، بەڵام لای ئێمە سەلامەتی گشتیی و پاراستنی گیانی هاوڵاتییان لەسەروی
هەمو شتێکەوەیە، بەتەنها هاوڵاتییانی خۆشەویستی شارەکەمان و شارەکانی تری هەرێمی
کوردستان لە ماوەی سێ ڕۆژی جەژنی ڕەمەزانی پیرۆز، سەردانی شوێنە گەشتیاریەکانیان
کردوە."