ئەنتۆنی بلینكن، وەزیری دەرەوەی ئەمریكا رایگەیاند، هێشتا ناكۆكی جددییان
هەن لەگەڵ تاران لە پەیوەست بە گفتوگۆ ناڕاستەوخۆكان لەبارەی بوژاندنەوەی
رێككەوتننە ئەتۆمییەكەی ئێران كە لە ڤییەنای پایتەختی نەمسا بەڕێوەدەچن.
ئاوێنە: ئەو قسانەی وەزیری دەرەوەی ئەمریكا، ئەمڕۆ هەینی، لەمیانی
كۆنگرەیەكی رۆژنامەوانیدا هاتن لەگەڵ هاوتا فەرەنسییەكەی.
وەزیری دەرەوەی ئەمریكا وتی، هێشتا ناكۆكی جددیمان هەن لەگەڵ تاران و ئومێد
دەكەین لە خولەكانی دیكەی گفتوگۆ ناڕاستەوخۆكانی ڤییەنادا ئەو ناكۆكییە نەمێنن.
هەروەها ئاماژەی بەوەشدا كە درێژنەكردنەوەی رێككەوتنی كاتی نێوان ئێران و
ئاژانسی نێودەوڵەتی وزەی ئەتۆم مایەی نیگەرانییەو ئەو نیگەرانیانەش گەیەندراونەتە
تاران.
دوێنێ پێنجشەممە، ماوەی رێككەوتنێكی كاتی نێوان ئێران و ئاژانسی نێودەوڵەتی
وزەی ئەتۆم بۆ رێگەدان بە ئاژانسەكە تا چاودێری هەندێك لە دامەزراوە ئەتۆمییەكانی
ئێران بكات، كۆتایی هات.