بەپێی قسەی فەرماندەی لیوای 2ی سەربە وەزارەتی پێشمەرگە، ئەمڕۆ ئەو ناوچانەیان بەسەر كردۆتەوە كە بڕیارە لەگەڵ سوپای عێراق سەنگەری هاوبەشێ لێ دابنێن لە ناوچە جێناكۆكەكان و دەشڵێت: هێزە هاوبەشەکە 50%ی لە سوپاسی عێراق و
ئەوی دیکەشی لە پێشمەرگە پێکدێت.
ئاوێنە: عەمید شوان شەمێرانی،
فەرماندەی لیوای 2، ئەمڕۆ پێنجشەممە، بە روداوی راگەیاند، "ئامانج لە بەسەرکردنەوە
مەیدانییەکە، دیاریکردنی ئەو بۆشاییانەیە کە پێویستیان بە دانانی سەنگەری هاوبەشی
هێزەکانی پێشمەرگەو هێزە عێراقییەکانە."
فەرماندەی لیوای
2 ئاماژەی بەوەش کرد، "لە تەواوی ناوچەکانی ماددەی 140 لە خانەقینەوە تاوەکو
شنگال، سەنگەری هاوبەش لێدەدرێت، کە ئامانج لێی پڕکردنەوەی بۆشاییە ئەمنییەکانە."
بە وتەی عەمید
شوان، "هێزە هاوبەشەکە لە هێزە عێراقییەکان و بە دیاریکراوی سوپای عێراق 50%
و هێزەکانی پێشمەرگە لە 50% دەبێت."
پێشتر جەبار یاوەر،
ئەمینداری گشتیی وەزارەتی پێشمەرگە راگەیاندبو،
هێزەکانی پێشمەرگە ناگەڕێنەوە شاری کەرکوک و تەنیا لەو شوێنانە بڵاودەکرێنەوە کە خەڵک
تێیاندا نیشتەجێ نین.
لێدوانەکەی ئەمینداری گشتیی وەزارەتی پێشمەرگە دوای ئەوە بو کە سێ پەرلەمانتاری
عەرەب و تورکمان بانگەشەی ئەوەیان دەکرد، هێزەکانی پێشمەرگە هەڕەشەی داعش دژی کەرکوک
وەکو بیانویەک بەکاردەهێنن بۆ گەڕانەوەیان. جەبار یاوەر وتی، بانگەشەی ئەو پەرلەمانتارانە
تەنیا بۆ بانگەشەی هەڵبژاردنە و بنەمای نییە.