ئەحمەد داودئۆغڵو، سەرۆکی پارتی ئایندە لە وتارێکدا کە لە پارێزگای وانی باکوری کوردستان پێشکەشى کرد رایگەیاند" باخچەلی سوکایەتى بە زمانى کوردی دەکات، منیش پێموایە کە سووکایەتیکردن بە زمانەکان، سوکایەتیکردنە بە مرۆڤایەتی لەناویشیاندا زمانى کوردی"

ئاوێنە: داودئۆغڵو رەحنە لە ئەردۆغان دەگرێت و رەتیدەکاتەوە کە کێشەى زمانى کوردی چارەسەر کردبێت و باس لەوە دەکات کە کورد نیعەمەتێکەو خودا لەم خاکەدا خولقاندویەتى، بۆیە دەبێت لە رووی مرۆڤایەتییەوە سەیری ئەم پرسە بکرێت نەک لە دیوی دیکەوە.

سەرۆکى پارتى ئایندە دەشڵێت، ئەگەر لەرووی مرۆڤایەتییەوە سەیرى بابەتەکە بکرێت ئەوا چارەسەری کیشەى کوردیش دەزانرێت بۆ چۆن حێبەجێ بکرێ.

هەروەها رەخنە لە دەوڵەت باخچەلیش دەگرێت و روونیدەکاتەوە کە باخچەلی بە هەندێ وشە سوکایەتى بە زمانى کوردی دەکات ئەمە دابەشکارییە لە ووڵاتدا دەکرێت.

ماوەیەکە ئەحمەد داودئۆغڵو، سەرۆکی پارتی ئایندە سەردانى شارە کوردییەکانى باکورى کوردستان دەکات و بۆ راکێشانى سەرنجی کوردەکان باس لەچارەسەرکردنى کێشەى کوردو زمانى کوردی دەکات، بەڵام چاودێرانى سیاسی کورد لەو بەشەى کوردستان ئەمە تەنیا وەک بانگەشەیەکى هەڵبژاردن لێکدەدەنەوەو پێیانوایە کە ناوبراو لەرووی پرسى کوردەوە هیچ جیاوازییەکى لەگەڵ ئەردۆغاندا نییە.