سەرۆكی لیژنەی گواستنەوەو گەیاندن لە پەرلەمانی عێراق، ئەمڕۆ شەممە، رایگەیاند، لە بودجەی ساڵی 2023دا، باجی سەر كارتی مۆبایل لادەبەن بۆ ئەوەی نرخەكەی وەك جارانی لێ بێتەوە.

ئاوێنە: زەهرە بەجاری، سەرۆكی لیژنەكە لە لێدوانێكدا بۆ پێگەی "شەفەق نیوز" رایگەیاندوە، لە بودجەی ساڵانی رابردودا، بڕگەیەك لەژێر ناوی زیادكردنی داهاتی دەوڵەت هەبوە، ئەویش بە دانانی باجێكی زیادە لەسەر كۆمپانیاكانی كارتی مۆبایل، بەڵام لیژنەی دارایی پەرلەمان و حكومەت، تێبینی ئەوەیان نەكردوە كە بڕە پارە زیادەیە خراوەتە سەر نرخی كارتەكانی مۆبایل و هاوڵاتیان ئەو باجە دەدەن نەك كۆمپانیاكان.

جەختیشی كردۆتەوە كە لیژنەكەیان لە پەرلەمانی عێراق كاردەكات بۆ لابردنی بڕگەی زیادكردنی ئەو باجەی سەر كارتی مۆبایل لە بودجەی 2023دا، بۆ ئەوەی نرخی كارتی مۆبایل بگەڕێتەوە بۆ نرخەكەی جارانی.

هەروەها باسی لەوەش كردوە كە تێڕوانینێكی تر هەیە بۆ دامەزراندنی كۆمپانیایەكی نیشتمانی بۆ پشتیوانی هاوڵاتیان كە لەگەڵ كۆمپانیاكانی مۆبایل كاربكات و جەختیشی كردۆتەوە كە ئەو پڕۆژەیە بەرزكراوەتەوە بۆ حكومەتی ئێستای عێراق بەڵام حكومەت دوایخستوە.

لە مانگی كانونی دوەمی ئەمساڵدا، دەزگای ناوەندیی ئاماری عێراق رایگەیاندبو، لە ساڵی 2020دا، ژمارەی بەشدارانی مۆبایل لە وڵات گەیشتۆتە زیاتر لە 39 ملیۆن بەشدار.