بۆ نەوشیروان مستەفا کە هێشتا یەکێتی بوو..

كاوه‌ محه‌مه‌د
  2020-05-19     1207

رۆژی (٢٠١٣/٦/٢٥) وتارێکم بەناونیشانی (سیاسییە قسەکەرەکە) لەهەفتەنامەی(ئاوێنە)دا بڵاوکردەوە کە ئەوکاتە هێشتا لەناو یەکێتی-دا مابووم، دوانریش وتارەکەم لەگەڵ کۆمەڵێ وتاری دیکەدا لەدووتوێی کتێبێکم بەناونیشانی (نەوتراوەکانم) دووبارە بڵاوکردەوە..
وتارەکەش لەبارەی رۆح و زمانە رەخنەییەکەی کاک نەوشیروان بوو کە ئەو لەناو یەکێتیش-دا هەمیشە ئەوەی دەوت کە ئەوانی دیکە نەیاندەوت یان نەدەوێران بیڵێن، نەک لەدوای جیابوونەوەی لەیەکێتی و لەپێگەی ئۆپۆزسیۆنبووندا ئەو نەفەس و زمانە رەخنەییەی بووبێت..
بۆ من زۆر قورس بوو کە ئەوکاتە هێشتا ئەندامی مەکتەبی راگەیاندنی یەکێتی بووم، ئەو وتارەم لەبارەی کەسێتی و هەڵوێستەکانی کاک نەوشیروانێک نووسی کە ئەوسا هەرچی کەناڵ و راگەیاندنکاری یەکێتییە بۆ هێرشکردنە سەر کاک نەوشیروان و بزووتنەوەکەی تەرخانکرابوون، بەڵام وەک بەرگریکردن لەراستیبەک کە خەریکبوو دەکەوتە بن تەپوتۆزی شەڕێکی بێ مانای ئیعلامیەوە، نووسیم و بڵاومکردەوە، بە تایبەتیش کە ئەوکاتە لەناو یەکێتی-دا قسەیەک زۆر دووبارە دەکرایەوە گوایە:"دەبوو کاک نەوشیروان کە لەناو یەکێتی-دا بوو ئەم رەخنانەی بگرتایە و کاری بۆ چاکسازی ناو یەکێتی بکردایە، نەک بچێتە دەرەوە و کار بۆ رووخاندنی ئەو تەلارە بکات کە خۆی بەکێک لەدروستکەرانی بوو...". وەک ئەوەی کاک نەوشیروان ئەمەی نەکردبێت، لەکاتێکدا هەموو توانا و کۆشانێکی لەناو یەکێتی بۆ چاکسازی و راستەڕێکردنی تەرخانکرد، بەڵام کە تەواو بێ ئومێد بوو و لەهەموو لایەکەوە گەندەڵکار و گەندەڵخۆران گەلەکۆمەکێیان لێکرد، ئینحا بە ناچاری لەیەکێتی دەستیلەکارکێشایەوە و کۆمپانیای وشە و دواتریش بزووتنەوەی گۆڕان-ی دامەزراند.
بۆیە لەیادی سێ ساڵەی کۆچی دوایی ئەو هاوڕێ سەرکردەیەمان بەپێویستمزانی کە پوختە و بەشێکی ئەو وتارەم بڵاوبکەمەوە کە جگە لەباسکردنی زمانە رەخنەییەکەی، باسی ئەو هەڵوێستە ئازایەنەیشیم کردووە کە لەکاتی نووسینەوەی یاسای کاتی بەڕێوەبردنی عیراق بۆ قۆناغی گواستنەوە ( TAL)دا سەبارەت بەپێداگری لەسەر مافەکانی کورد لەعیراقدا هەیبوو و داوای (عصیانی مەدەنی) کرد کە ئەمەش (مام جەلال)ی زۆر تووڕەکرد. 



سیاسیە قسەکەرەکە

رۆژی (6/1/2004)؛ كە سەرنووسەری (كوردستانی نوێ) بووم، كاك نەوشیروان  وتارێكی خۆی بۆ ناردین، بەناونیشانی (كورد و ، قانونی بەڕێوەبردنی دەوڵەتی عیراق لەماوەی گواستنەوەدا). رۆژی دواتر وتارەكەیمان بڵاوكردەوە، بەڵام تووڕەیی مام جەلال و هەندێ لەئەندامانی مەكتەبی سیاسیی یەكێتی بەدوای خۆیدا هێنا، چونكە لەوتارەكەدا بەئاشكرا داوای (مقاوەمەتی سلبی و عصیانی مەدەنی) كردبوو و نووسیبووی ؛"ئێستا كە (قانون ادارە الدولە العراقیە للفترە الانتقالیە) ئەنوسرێ،....،كاتی گوڵبارانی كاربەدەستانی ئەمەریكی و (موجامەلە)ی هێزە سیاسییەكانی عیراق بەسەرچو. كاتی پێداگرتنە لەسەر چەسپاندنی مافە نەتەوەییەكانی كورد.....نابێ سەركردایەتی كورد هیچ بیانووێك بۆ دواخستنی قبوڵ بكا و، ئەبێ سور بێ لەسەر چەسپاندنی مافەكانی خۆی و دانپیانانی هەرچی زوتریدا. ئەگەر لەمەدا، بەڕێگەی گفتوگۆ لەگەڵ مەجلیسی حوكم و سوڵتەی ئیئتیلاف، نەگەیشتە ئەنجام ئەبێ پێش تەواوكردنی نوسینی قانونەكە و، پێش كۆتایی مانگی شوبات رێگەیەكی تر بگرێ، ئەویش رێگەی (مقاوەمەت و عصیانی مەدەنی)یە......".

مەبەستمە بڵێم، نەوشیروان مستەفا نەك ئێستا، ئەو كاتانەی لەناو یەكێتیش بوو، بەردەوام سیاسییەكی قسەكەر بووە (بەمانای وتنی ئەوەی ئەوانی دیكە نەیاندەوت)، قسەكانیشی تەنیا لەناو مەجلیسەكانی سیاسەتدا نەبووە، بەڵكو زۆر لەبیروڕاكانی لەرۆژنامە و كتێبەكانیدا بڵاوكردۆتەوە. ئیتر رەخنەكردنی بەوەی بۆ ئێستا وا دەڵێ و بۆ پێشتر كە لەدەسەڵاتدا بوو وای نەوت و وای نەكرد ؟! رەخنەیەكی ناتەواو و بێ زەمینەیە. ئەو كە كەسی دووەمی حزبێكی دەسەڵاتدار بووبێت، ئاوا قسەی كردبێ و گوێی بەوە نەدابێ كێ خۆشحاڵ و كێ-ش نیگەران دەكات، ئاساییە كە ئێستا سەركردەی ئۆپۆزسیۆنە و چەند مانگێكی كەمیش لەبەردەمدا ماوە بۆ سێ هەڵبژاردنی گرنگ، بەو نەفەسە قسە بكات كە لەوتارەكەی رۆژی (18)ی ئەم مانگەدا گوێمان لێی بوو.

زۆرترین بینراو
© 2020 Awene Online, Inc. All Rights Reserved.
×