سه‌ڵاحه‌دین به‌هائه‌دین، ئه‌مینداری گشتی یه‌كگرتوی ئیسلامی كوردستان رایگه‌یاند، ئه‌وان لەگەڵ لێکتێگەیشتن و چارەسەری یاسایی وئاشتیانەی گرفتەکانین لەگەڵ بەغدا، بەڵام "نابێت لەسەر حسابی مافی زەوتکراوی موچەخۆرانی هەرێم بێت و تەحایول بێت"، ده‌شڵێت، "بەڵێ، بۆ دابینکردنی قوت و ئازادی هاوڵاتیانی نیشتمان نەخێر، بۆ گەندەڵی و نادادی و ئیستیغلالی سۆزی نەتەوەیی بۆمەرامی کەسی و حزبی".
ئاوێنە: سه‌ڵاحه‌دین به‌هائه‌دین له په‌یامێكدا له تۆڕی كۆمه‌ڵایه‌تی ئێكس هه‌ڵوێستی خۆی له‌باره‌ی دواكه‌وتنی موچه راگه‌یاندوه و باسی له‌وه‌كردوه، "بەداخەوە گەیشتینە ڕۆژگارێک پاش 55 ڕۆژ هەواڵی موچە بە موژدە بڵاودەکرێتەوە".
ئاماژه‌ی به‌وه‌شكردوه، هەمیشە ئه‌وان لەگەڵ لێکتێگەیشتن و چارەسەری یاسایی وئاشتیانەی گرفتەکانین لەگەڵ بەغدا، بەڵام "نابێت لەسەر حسابی مافی زەوتکراوی موچەخۆرانی هەرێم بێت و تەحایول بێت لەسەر بڕیارەکانی دادگای باڵای فیدڕاڵی سەبارەت بەمسۆگەرکردنی ماف و شایستەداراییەکانی هاوڵاتیانی موچەخۆرانی هەرێم".
سه‌ڵاحه‌دین به‌هائه‌دین ده‌ڵێت، "بەڵێ، بۆ قەوارەی دەستوری هەرێم، بەڵێ، بۆ دابینکردنی قوت و ئازادی هاوڵاتیانی نیشتمان نەخێر، بۆ گەندەڵی و نادادی و ئیستیغلالی سۆزی نەتەوەیی بۆمەرامی کەسی وحزبی".
دوێنێ چوارشەممە دوای تەواوبونی کۆبونەوەی ئەنجومەنی وەزیرانی حکومەتی هەرێم، مەسرور بارزانی له په‌یامێكی ڤیدیۆیدا ڕایگەیاند، "وەزارەتی داراییم ڕاسپارد بۆ دابەشکردنی موچەی مانگی دو و ئامادەکاریکردن بۆ دابینکردنی موچەی مانگی سێی فەرمانبەران".
بڕیارەکەی حکومەتی هەرێم بۆ دابەشکردنی موچەی مانگی دو لەکاتێکدایە، ماوەی زیاتر لە 50 ڕۆژە موچە دابەشنەکراوە و حکومەتی هەرێم لە 6 مانگی ڕابردودا تەنها توانیویەتی یەک موچە دابەشبکات.