لیژنەی باڵای ئەزمونە گشتییەكان لە وەزارەتی پەروەردە رایگەیاند: ئەو
وەڵامە نمونەییانەی دوای تاقیكردنەوەی هەر بابەتێكی ئەزمونە گشتییەكانی قۆناغی
ئامادەیی دادەنرێن، وەڵامی بەرایین و دوای راوێژو وەرگرتنی سەرنجی زیاتری كەسانی
شارەزا، لە كۆتا رۆژی تاقیكردنەوەكاندا، وەڵامەكان پلەی بنبڕ وەردەگرن.
ئاوێنە: كەریم لەتیف ئیسماعیل، سەرۆكی لیژنەی باڵای ئەزمونە گشتییەكان
لەوەزارەتی پەروەردە لە نوسراوێكدا كە ئاڕاستەی بەڕیوەبەرایەتییە گشتییەكانی
هەولێر، سلێمانی، دهۆك، گەرمیان و هەڵەبجەی كردوە، رایگەیاندوە"ئاگادارتان
دەكەینەوە كە لەدوای تاقیكردنەوەی هەر بابەتێكی ئەزمونە گشتییەكانی قۆناغی
ئامادەیی ساڵی خوێندنی 2019-2020 لەلایەن لیژنەیەكی پسپۆڕ كە نوێنەری بەڕێوەبەرایەتی
گشتی پەروەردەكانن، وەڵامی نمونەیی بۆ پرسیارەكان دادەنرێن."
رونیكردۆتەوە"ئەم وەڵامانە بە وەڵامی بەرایی هەژمار دەكرێن و دوای
راوێژی زیاترو وەرگرتنی سەرنج و تێبینی كەسانی شارەزا لە بابەتەكان و لە كۆتا رۆژی
تاقیكردنەوە گشتییەكاندا، ئەم وەڵامانە پلەی بنبڕ وەردەگرن و دەبنە بنەمایەك بۆ
پشكنینی سۆماكان."
جەختیشی كردۆتەوە كە "پڕۆسەی پشكنینی سۆماكان لە بەرژەوەندی قۆتابیان
و خوێندكاران یەكلایی دەكرێتەوەو مافی هیچ قوتابی و خوێندكارێك نافەوتێت."