مەلا بەختیار: یەكێتی سیاسەتی دووفاقی پەیڕەو دەكات
  2020-08-12       817       

مەلا بەختیار ئەندامی ئەنجومەنی باڵای سیاسی یەكێتی 13 خاڵ بۆ چارەسەركردنی دۆخی هەرێمی كوردستان دەخاتەڕوو و حزبەكەشی بە پەیڕەوكردنی سیاسەتێكی دووفاقی تۆمەتبار دەكات.

ئاوێنه‌: ئەمڕۆ چوار شەممە، مەلا بەختیار ئەندامی ئەنجومەنی باڵای سیاسی و بەرژەوەندییەكانی یەكێتی، لە وتارێكدا بۆچوونی خۆی دەربارەی كۆبوونەوەكەی مەكتەبی سیاسی یەكێتی و پارتی راگەیاند كە دوێنێ سێ شەممە لە شارۆچكەی دوكان بەڕێوەچوو.

مەلا بەختیار “لەبەر رۆژشنایی راگەیەندراوەكەی یەكێتی-پارتی” دەڵێت: راگەیەندراوەكە “به‌زۆری، بۆچونه‌كانی پارتی تیایدا ره‌نگی سیاسی داوه‌ته‌وه‌”.

هاوكات ئاماژەشیدا بەوەی یەكێتی سیاسیەتی “دووفاقی” پەیڕەو دەكات و نووسیوێتی كە‌ روانگه‌ی پارتی حوكمڕانی زۆرینه‌یە و یەكێتیش “سیاسه‌تی دووفاقی (ده‌سه‌ڵات-ئۆپۆزسیۆن)” پەیڕەو دەكات، بۆ چارەسەركردنی دۆخەكە و باشكردنی پەیوەندییەكانیش 13 خاڵ دەخاتەڕوو.

دەقی وتارەكەی مەلا بەختیار:

ململانێ‌و ئه‌ركه‌كان.. له‌به‌ر رۆشنایی راگه‌یه‌ندراوی یه‌كێتی-پارتی
مه‌لا به‌ختیار

رۆژی 11/ی ئابی 2020، یه‌كێتی‌و پارتی، كۆبونه‌وه‌یه‌كی تریان ئه‌نجامدا. وادیاره‌ ئه‌م كۆبونه‌وه‌یه‌ش، هێشتا، له‌لایه‌ن پارتیه‌وه‌، بۆ زه‌مینه‌خۆشكردنی كۆبونه‌وه‌ی باڵایه‌.. كه‌ تیایدا متمانه‌ی په‌یوه‌ندی سیاسی هه‌ردوولا هاتبێته‌ئاراوه‌. كه‌ به‌داخه‌وه‌، ئه‌و متمانه‌ سیاسییه‌، به‌ موزایه‌ده‌ی سیاسی‌و هه‌لپه‌رستی، له‌ده‌ست درا.

جگه‌له‌وه‌ی راگه‌یه‌ندراوه‌كه‌، هه‌ڵه‌ی رێزمانی جۆراوجۆری تیایه‌. ناوه‌رۆكه‌كه‌شی، له‌دوای لێكدابڕانی نێوان هه‌ردوولاو پروپاگه‌نده‌كانیشیان به‌رامبه‌ر یه‌كتر له‌ ساڵی رابوردوه‌وه‌.. كه‌ به‌ دوو ئاڕاسته‌ی جیاوازی سیاسی، ناكۆكیه‌كانیان قوڵده‌كرد:

– ئاڕاسته‌ی یه‌كێتی.. هه‌ر له‌ كێشه‌ی زینۆی وه‌رتێوه‌، بۆ باسكردنی لامه‌ركه‌زی ئیداری.. تا ده‌گاته‌ هه‌ڕه‌شه‌ی گۆڕینی حكومه‌ت، گوایه‌ یه‌كێتی چیكه‌، به‌ سیاسه‌تی پێش چواره‌مین كۆنگره‌، له‌و په‌یوه‌ندییه‌ ناهاوسه‌نگییه‌ی له‌ته‌ك پارتی رازی نابێ‌.. تاد.

– ئاڕاسته‌ی پارتیش.. داكۆكی له‌ حكومه‌تی سه‌رانسه‌ری هه‌رێم‌و پاراستنی حكومه‌ت‌و دووركه‌وتنه‌وه‌ له‌ راگه‌یاندنی زبرو گرژو یه‌كهه‌ڵوێستی له‌ په‌رله‌مان.. تاد.

راگه‌یه‌ندراوی هاوبه‌شی دوێنێ‌، به‌زۆری، بۆچونه‌كانی پارتی تیایدا ره‌نگی سیاسی داوه‌ته‌وه‌. ئه‌وه‌ی له‌ كۆبونه‌وه‌كه‌و راگه‌یاندراوه‌كه‌دا باسنه‌كراوه‌، ئه‌مانه‌ی خواره‌وه‌ن:

– چاره‌سه‌ركردنی كێشه‌ی زینۆی وه‌رتێ‌.
– لامه‌ركه‌زیه‌تی ئیداری.
– هاوسه‌نگی حوكمڕانی.
– توخنی نه‌هێشتنی گه‌نده‌ڵی.. نه‌كه‌وتون.
– باسی كۆنترۆڵكردنی گومرگه‌كان نه‌كراوه‌.
– قسه‌ له‌ نه‌وتی به‌قاچاخ براو له‌ئارادا نه‌بووه‌.. تاد.

له‌ هه‌موو حاڵه‌تێكدا.. به‌بێ‌ ئه‌وه‌ی گوێ‌ بده‌مه‌ موزایه‌ده‌و پروپاگه‌نده‌ی هه‌لپه‌رسته‌ مشه‌خۆره‌كان، به‌نده‌، وتومه‌و ده‌یڵێم:

سه‌ره‌ڕای جیاوازیه‌كان، نه‌ك په‌یوه‌ندی یه‌كێتی‌و پارتی به‌ ئه‌رك ده‌زانم.. به‌ڵكو چاره‌نوسسازیشه‌. هاوكات، په‌یوه‌ندی هه‌ردوولاو بزوتنه‌وه‌ی گۆڕان، به‌ بناغه‌ی حوكمڕانی ئه‌م قۆناغه‌ داده‌نێم. هه‌روه‌ها، په‌یوه‌ندی مه‌ده‌نی له‌گه‌ڵ لایه‌نه‌كانی دیكه‌شدا، گرنگه‌.

ئه‌م په‌یوه‌ندییه‌، دوور له‌ روانگه‌ی حوكمڕانی زۆرینه‌ی پارتی‌و سیاسه‌تی دووفاقی یه‌كێتی (ده‌سه‌ڵات-ئۆپۆزسیۆن) پێویستی به‌ لێكدانه‌وه‌یه‌كی هه‌مه‌لایه‌نه‌ی هاوچه‌رخه‌.. له‌به‌ر رۆشنایی گۆڕانكاریه‌كان. لێكدانه‌وه‌ی هاوچه‌رخ واتا:

یه‌كه‌م: سیسته‌می حوكمڕانی گۆڕانكاری ریشه‌یی به‌سه‌ردا بێت.

دووه‌م: له‌ماوه‌ی 6 بۆ 12 مانگ، ده‌ستوری هه‌میشه‌ دیموكراسی-مه‌ده‌نی گه‌لپه‌سه‌ند، په‌سه‌ند بكرێ‌.

سێهه‌م: شه‌فافیه‌ت له‌ ته‌واوی سه‌رچاوه‌كانی داراییدا هه‌بێ‌.

چواره‌م: گه‌نده‌ڵی ریشه‌كێش بكرێ‌‌و هه‌ر لایه‌ك‌و كه‌سێك، كۆن‌و نوێ‌ گه‌نده‌ڵی له‌سه‌ر بسه‌لمێندرێ‌، سامانی حكومه‌تیان لێبسه‌ندرێته‌وه‌و دادگایی بكرێن.

پێنجه‌م: ستراتیژی گه‌شه‌پێدانی مرۆیی، له‌ زانكۆكاندا به‌ بودجه‌ی ته‌واوه‌وه‌، به‌ سه‌ربه‌خۆیی زانكۆكانه‌وه‌، په‌رله‌مان یاسای بۆ ده‌ربكات.

شه‌شه‌م: ئاسه‌واری دوو ئیداره‌یی نه‌مێنێ‌‌و هێزه‌ چه‌كداره‌كان.. به‌ پرۆژه‌یه‌كی گشتگیرو به‌ ده‌ستور یه‌كبخرێته‌وه‌. به‌ ئاساییشه‌وه‌.

حه‌وته‌م: ژێرخانی ئابوری به‌رهه‌می فره‌چه‌شن؛ پیشه‌سازی، نه‌وت، كشتوكاڵ، گه‌شتوگوزار.. پته‌و بكرێ‌.

هه‌شته‌م: یاسای سۆسیال-دادپه‌روه‌ری بچه‌سپێندرێ‌.

نۆهه‌م: ژنان.. یه‌كسان له‌ته‌ك پیاوان، ئه‌رك‌و مافیان به‌ كرده‌وه‌ هه‌بێ‌!

ده‌هه‌م: ئه‌نجومه‌نی سه‌نا (پیران) بۆ ته‌كنۆكرات‌و شاره‌زاو شایسته‌كان، هه‌ڵبژێردرێ‌.

یانزه‌هه‌م: حكومه‌ته‌كان.. نیوه‌ی كه‌متریان، ته‌كنۆكرات‌و پسپۆڕ نه‌بن.

دوانزه‌هه‌م: نه‌خوێنده‌وارو ده‌رچوی خوێندنی سه‌ره‌تایی-ناوه‌ندی، له‌ په‌رله‌ماندا، قبوڵ نه‌كرێ‌.

سیانزه‌هه‌م: به‌پێی رێژه‌ی كوردو پێكهاته‌ ره‌سه‌نه‌كانی تر، له‌ ناوچه‌ كێشه‌ له‌سه‌ره‌كان، كاندیدیان له‌ په‌رله‌مانی كوردستان‌و حكومه‌تی هه‌رێمدا هه‌بێ‌.

ئه‌و بنچینانه‌.. و ئه‌ركی دیكه‌ش، پێویستن‌و ده‌شبێ‌ بكرێنه‌ پرۆژه‌ی ستراتیژی هاوچه‌رخ، بۆ حوكمڕانی دیموكراسی-مه‌ده‌نی.. ئه‌گینا، به‌دڵنیاییه‌وه‌، ئه‌م شێوه‌ حوكمڕانییه‌-حیزبییه‌ گۆشه‌گیرییه‌ی ئێستای هه‌رێم، زیانی به‌ ئه‌ندازه‌ی ئه‌قڵیه‌تی تایفه‌گه‌ری، بۆ سیسته‌می دیموكراسی هه‌یه‌.


12/8/2020

زۆرترین بینراو
© 2020 Awene Online, Inc. All Rights Reserved.
×