2020-12-01   612     
بەهادین نوری، سکرتێری پێشوتری حزبی شیوعی عێراق دوای چەند رۆژێک لە توشبوونی بە ڤایرۆسی کۆرۆنا و خرانەژێرچاودێری چڕی پزیشکییەوە، لەتەمەنی 93 ساڵیدا و لەژێر کاریگەری ئەو پەتایەدا بەرەبەیانی ئەمڕۆ سێشەممە لەشاری سلێمانی گیانی لەدەستدا.
ئاوێنە: د.هەڤاڵ ئەبوبەکر، پارێزگاری سلێمانی بۆ کۆچی دوایی بەهادین نوری پرسەنامەیەکی بڵاوکردەوە و لەبەشێکی راگەیەنراوەکەدا هاتوە، "بەناوی پارێزگای سلێمانییەوە؛ پرسەو ماتەمینیی و پەژارەی خۆمان بۆ کۆچی دوایی کەسایەتیی سیاسیی و فەرهەنگیی بەڕێز و پێشمەرگەو سەرکردەو تێکۆشەری خەباتی نیشتمانیی و چینایەتیی کوردستان و عیراق؛ مامۆستا بەهادین نوری؛ دەردەبڕین، داواخوازین خودای گەورە ئارامیی بە هەموو لایەکمان ببەخشێت و ڕۆحی بەڕێزیان شادبێت".
شەوی رابردوش نیاز نەجمەدین، برازای بەهادین نوری لە راگەیەنراوێکدا باسی لەوەکردبو، "چەند رۆژێكە مامی ئازیزم مامۆستا بەهادین نوری بەدەست نەخۆشییەوە ئازارێكی سەخت دەچێژێت. دوێنێ و ئەمڕۆ زۆر بەرەو خراپتر چووە تا وای لێكرد لە نەخۆشخانە خەوێنراوە".
بەهادین نوری یەکێکە لەدیارترین ناوەکانی بزوتنەوەی چەپ لەعێراق و کوردستان، لە 11-ی شوباتی 1927 لەگوندی تەکیە سەبە قەزای قەرەداغی پارێزگای سلێمانی لەدایکبوە.
لەساڵی 1946 پەیوەندی بەحزبی شیوعی عێراقییەوە کردوە و بۆماوەی چوار ساڵ سکرتێری ئەو حزبە بوە، لەساڵی 1953 دەسەڵاتدارانی سیستمی پاشایەتی عێراق دەستگیریان کردوە و لەدوای شۆڕشی 1958 ئازادکراوە.
بەهۆی ناکۆکی لەگەڵ حزبی شیوعیدا، لەساڵی 1984 ریزەکانی ئەو حزبەی جێهێشتووە و لەدوای راپەڕین گەڕاوەتەوە کوردستان.
بەهادین نوری بەر لەتوشبوونی بەپەتای کۆرۆنا و لەتەمەنی 93 ساڵیدا وەک کەسێکی بەئەزموون رۆژانە بۆچوونی خۆی لەسەر رووداوە سیاسییەکانی هەرێمی کوردستان و عێراق و ناوچەکە بڵاودەکردەوە.