2020-12-21   607     
موقتەدا سەدر، رێبەری رەوتی سەدر رایدەگەیەنێت، پێویستە حكومەتی عێراق باری نائاسایی لەشاری بەغدا ڕابگەیەنێت و بەتەنها پشت بە سوپا ببەستێت بۆ پاراستنی هاوڵاتیانی مەدەنی و نێردە دیپلۆماتییەكان.
ئاوێنه: موقتەدا سەدر، رێبەری رەوتی سەدر لە تویتێكدا لە هەژماری تایبەتی خۆی لە تۆڕی تویتەر نووسیویەتی "پێویستە حكومەت باری نائاسایی لە بەغداد ڕابگەیەنێت و بەتەنها پشت بە سوپا ببەستێت بۆ پاراستنی هاوڵاتیانی مەدەنی و نێردە دیپلۆماتییەكان"، باسی لەوەشكردووە "پێویستە لەسەر پەرلەمانی عێراق دانوستان لەگەڵ باڵیۆزخانەی ئەمریكا بكات بۆ كۆتاییهێنان بە داگیركاریی و دەستوەردان لە كاروباری ناوخۆی عێراق".
سەدر ئاماژەی بەوەكردووە "خودایە من گەواهی دەدەم كە ئاگادارمكردوونەتەوە و لەئاگاداركردنەوە بەردەوام دەبم"، ئاماژەی بەوەشكردووە "سنووری عێراق لە مەترسی بەردەوامدایە، ئەو وەك هەمیشە دیلی دەستی گەندەڵییە".
سەدر وتویەتی "دوژمنان دزە دەكەن، میلیشیاكان كۆنترۆڵی وڵات دەكەن و قاچاغچیێتی بە ماددە هۆشبەرەكان، سەروەت و سامان، چەكداران، كاڵاكان و شتەكانی دیكەش چڕكراونەتەوه، ئەمەش ئاسایش و ئابووری خستووەتە مەترسییەوە، هەر لەو روەشەوە داوای باری نائاسایی لەشاری بەغدای پایتەختی عێراق دەكات".