2021-04-22 358
وتەبێژی وەزارەتی پەیوەندییەكانی عێراق رایگەیاند: لەڕێی حكومەتی میسرەوە عێراق یەكەم مانگی دەستكردی تایبەت بەخۆی رەوانەی بۆشایی ئاسمان دەكات.
ئاوێنه: ڕەعد مەشهەدانی وتەبێژی وەزارەتی پەیوەندییەكانی عێراق رایگەیاند: حكومەتی میسر دەستپێشخەرییەكی كردووە لە بارەی دروستكردنی یەكەمین مانگی دەستكردنی تایبەت بەعیراق. دەشڵێت: بەغدا لەگەڵ كۆمپانیای ئەیرباسی فەڕەنسی رێككەوتووە بەمەبەستی جێبەجێكردنی پڕۆژەكە.
وتەبێژی وەزارەتی پەیوەندییەكانی عێراق ئاماژەی بەوەشداوە: مانگە دەستكردەكە بۆ عێراق زۆر گرنگە، بەوپێیەی ژمارەی كەناڵە ئاسمانییەكانی عێراق گەیشتووەتە نزیكەی 150 كەناڵ و لە چەندین بواری تری تەكنەلۆژیاش سوودی دەبێت.
بەوتەی مەشهەدانی، عێراق بەنیازە لەبواری مانگی دەستكرد سوود لە ئەزموونی میسر وەربگرێت و جگە لەحكومەتی میسر، كۆمپانیای عەرەب ساتیش ئامادەیی خۆی نیشانداوە هاوكاری عێراق بكات لە دروستكردنی مانگە دەستكردەكە.