2021-05-01 376
پەیامى حکومەتى هەرێمى کوردستان سەبارەت بە هێرشەکەى شەوی ڕابردووی داعش بۆسەر پێشمەرگە ڕاگەیەنراوێکی بڵاوکردەوە و ڕایگەیاند، هێرشەکە لەکاتێکدایە پێشتر چەندین جار حکومەتی عێراقی لەو بۆشاییە ئەمنییە ئاگادارکردووەتە کە لەو ناوچەنا دروست بووە.
ئاوێنه: لە ڕاگەیەنراوێکدا جوتیار عادل، وتەبێژی حکومەتی هەرێمی کوردستان ڕایگەیاند، " شەوی ڕابردوو تیرۆریستانى داعش هێرشیان کردە سەر سەنگەرەکانی هێزى پێشمەرگەی کوردستان و لە بەرامبەردا هێزى قارەمانى پێشمه‌رگه‌ش به توندی لێیان هاتنە ده‌ست و تێکیان شکاندن، و لە ئەنجام دا چەند پێشمەرگەیەک شەهید و بریندار بوون."
ئاماژەی بەوەشکردووە، "ئەم رووداوە لە دوای ئەوە دێت کە حکومەتی هەرێمی کوردستان پێشتر و ئێستاش چەندین جار حکومەتی عێراقی فیدڕاڵی ئاگادارکردۆتەوە کە ئه‌و شوێنەى تیرۆریستانی داعش هێرشیان كرده سه‌ر کە کەوتووەتە نێوان هێزى پێشمەرگە و سوپاى عێراق، بۆشایی ئەمنیی تێدا هەیە و بۆتە دەرفەتێک بۆ ئەوەی تیرۆرستانی داعش خۆیانی تێدا ڕێکبخەنەوە و بەمەش مەترسیەکى جددى لەسەر ناوچەکە دروست دەکات، بۆیە هاوکارى و هەماهەنگیی ئەمنیی نێوان سوپای عێراق و هێزی پێشمەرگە ئامانجی سەرەکی حکومەتی هەرێمە و هەمیشە ئامادەیی خۆیشی بۆ ئەم مەبەستە دەربڕیوە."
ئەوەشی خستووەتەڕوو، "وەک حکومەتى هەرێمى کوردستان پرسە و سەرەخۆشى لە خۆمان و لە بنەماڵەى شەهیدان دەکەین و هیواى زوو چاکبوونەوەش بۆ پێشمەرگە بریندارەکان دەخوازین."
درەنگانی شەوی ڕابردوو لە سنووری شارۆچكەی پردێ، چەکدارانی داعش هێرشیان کردووەتە سەر خاڵێکی هێزەكانی پێشمەرگە و بەهۆیەوە سێ پێشمەرگە گیانیان لەدەستداوە و دوو پێشمەرگەش برینداربوون.