سێ پەرلەمانتاری كورد لە پەرلەمانی عێراق پێیانوایە پەسەندكردنی سزای پێنج چالاكوان و رۆژنامەنوسی بادینان لەلایەن دادگای پێداچونەوەوە، دو ئامانج بۆ "ستەمكاران" دەپێكێت و بە پێویستیشی دەزانن دەزگا دادوەرییەكانی عێراق لەو بابەتەدا رۆڵیان هەبێت و "نەهێڵن چیتر دادگا بۆ مەرامی سیاسی بەكاربهێنرێت."

ئاوێنە: هەر سێ پەرلەمانتار، غالب محەمەد، سەركەوت شەمسەدین و رێبوار كەریم، ئەمڕۆ پێنجشەممە لە راگەیەندراوێكی هاوبەشدا وتویانە"لەئێستادا گفتوگۆی گەرمی لایەنە سیاسییەکان بۆ قۆناغی داهاتوی عێراق و کوردستان و بەرەنگاربونەوەی ئاستەنگەکان بەڕێوەدەچێت. لەگەرمەی ئەو گفتوگۆیەدا سزای زیندانیکراوانی بادینان لەلایەن دادگای تەمیزەوە سەپێندراو حوکمی شەش ساڵەکە بوە بڕیارێکی چەسپاو."

ئەوەشیان خستۆتەڕو"ئەم هەوڵەو لەم کاتەدا دو ئامانج بۆ ستەمکاران دەپێکێت، لەلایەك لایەنە سیاسییەکان سەرقاڵن بە گفتوگۆی سیاسی و پێناچێ هەڵوێستی توندیان هەبێ سەبارەت بەو کەیسە. لەلایەکیتریشەوە ئەو حوکمە ستەمکارانەیە دەچەسپێت کە بەناهەق بەرامبەر گیراوانی بادینان دەرکراو ئیتر دەبێتە وانەیەکیش بۆ خەڵکانیتر."

ئەو سێ پەرلەمانتارە كوردە جەختیان كردۆتەوە كە "ئەم بابەتە نابێ بێدەنگی لێ بکرێت و ئێمە لای خۆمانەوە بە وردی کار لەسەر تەواوی ئەو بڕگانە دەکەین، بەتایبەتی ئەوەی پەیوەندیدارە بە گفتوگۆی چالاکوان و رۆژنامەنوسان لەگەڵ باڵیۆزخانەو کونسولگەری وڵاتان."

هەروەها بە پێویستیان زانیوە كە "دامودەزگا دادوەرییەکانی عێراق لەم بابەتەدا رۆڵیان هەبێت و نەهێڵن چیتر دادگا بۆ مەرامی سیاسی بەكاربهێنرێت."