2021-08-21 224
وتەبێژی فەرماندەی گشتیی هێزە چەکدارەکانی عێراق ڕایگەیاند، لە ئەنجامی ئۆپەراسیۆنێکی سوپا، 76 موشەکی نەمسایی و چوار بۆمبی ئامادەکراو بۆ تەقینەوە دەستیان بەسەرداگیراوە.
ئاوێنه: یەحیا ڕەسوڵ، وتەبێژی مستەفا كازمی فەرماندەی گشتیی هێزە چەکدارەکانی عێراق ڕایگەیاند، “لەو ئۆپەراسیۆنەدا 9 کەس بە تۆمەتی جیاواز دەستگیرکراون و دوو لە تۆمەتبارەکان بە مادەی ڕوبەڕوبوونەوەی تیرۆر دەستگیرکراون”.
بەپێی وتەی ئەو بەرپرسە ئەمنییە، 7 کەس لەو کەسانەی دەستگیرکراون تۆمەتی جیاوازیان هەیە و تاوانی جۆراوجۆریان ئەنجامداوە و داواکراو بوون.
سەبارەت بە شوێنی کۆگای چەک و تەقەمەنییەکان، وتەبێژی فەرماندەی گشتیی هێزە چەکدارەکان ڕایگەیاندووە، کۆگاکە لە گوندی (ابو شحمة) لە ناحیەی ڕەشاد دۆزراوەتەوە و لێکۆڵینەوە دەکرێت بزانرێت کۆگاکە هی کێ بووە.
لەدوای تێکشکاندنی داعش چەکدارانی ئەو ڕێکخراوە لە دەوروبەری کەرکوک ماونەتەوە و هەندێکجار بە ڕفاندنی خەڵک و هێرشکردنە سەر هێزە ئەمنییەکان چالاكی دەنوێنن.