ئەمشەو یەكشەممە، ئەو هێزانەی لە ئەنجامەكانی هەڵبژاردن ناڕازین لە ماڵی نوری مالیكی، سەرۆكی دەوڵەتی یاسا كۆبونەوە. ئەوان جارێكی دیكە جەخت لە رەتكردنەوەی ئەنجامەكانی هەڵبژاردن دەكەنەوەو دەشڵێن: شێوازی مامەڵەی كۆمسیۆن لەگەڵ سكاڵا یاساییەكانیش رەتدەكەنەوەو داوای دەستوەردانی سەرۆك كۆماریش دەكەن.
ئاوێنە: لە بەیاننامەیەكدا ئەو هێزانە وتویانە، لە كۆبونەوەكەی ئەمشەوی ماڵی نوری مالیكیدا، تاوتوێی ئەو روداو و پێشهاتانەیان كردوە كە دەیسەلمێنن كێشەیەكی گەورە هەیە لە راگەیاندنی ئەنجامەكانی هەڵبژاردن كە ئەوەش گرژی سیاسی و كۆمەڵایەتی لێكەوتۆتەوە.
بەگوێرەی بەیاننامەكە، هێزەكانی بەشدار لە كۆبونەوەكە، رێككەوتن لەسەر رەتكردنەوەی ئەو ئەنجامانەی راگەیاندراون لەگەڵ رەتكردنەوەی شێوازی كۆمسیۆن بۆ مامەڵەكردن لەگەڵ سكاڵا یاساییەكانداو داواكاریشن لە كۆمسیۆن بە جدی بە سەرجەم تانە پێشكەشكراوەكاندا بچێتەوەو دەنگی سەرجەم وێستگەكان بە دەستی و بەشێوەیەكی شەفافانە بژمێردرێنەوەو ئەو هەڵانەش راستبكرێنەوە كە هاوكاتی پڕۆسەی ژماردنی دەنگەكان و راگەیاندنیاندا كراون.
هەروەك ئەو هێزانە لە بەیاننامەكەیاندا داوایان لە سەرۆك كۆمار بەو پێیەی كە پارێزەری دەستورە دەستوەردان بكات بۆ رێگری لەوەی كە روداوەكان بەرەو ئاڕاستەی مەترسیدارتر نەڕۆن.