قوباد تاڵەبانی جێگری سەرۆک وەزیران لە کۆبونەوەیەکدا لەگەڵ مارتین جایگەر، باڵیۆزی ئەڵمانیا لە عێراق رایگەیاند، دانوستانەکانی ئەمجارەیان بۆ پێکهێنانی حکومەتی داهاتوی عێراق جیاوازەو وەرگرتنی پۆست و ئیمتیاز ئەولەوییەت نییە بەڵکو ئەولەوییەت مەرجە سیاسی و ئابوری و ژینگەییەکانە.
ئاوێنە: بەپێی راگەیەندراوێكی نوسینگەكەی، لە تەوەرێکی کۆبونەوەکەدا لەگەڵ باڵیۆزی ئەڵمانیا و شاندی یاوەری کە ئەمڕۆ سێشەممە، بەڕێوەچو، تاوتوێی دۆخی سیاسی عێراق و پرۆسەی دانوستانەکانی پێکهێنانی حکومەتی داهاتو کرا و جێگری سەرۆک وەزیران جەختی کردەوە کە پێویستە لایەنە کوردییەکان بە یەکدەنگی و بە پڕۆژەی هاوبەش بچنە دانوستانەکانی پێکهێنانی حکومەتەوە.
قوباد تاڵەبانی راشیگەیاند "بە داخەوە لە رابردودا دانوستانەکان زیاتر لەسەر وەرگرتنی پۆست و ئیمتیازات چڕکرابوەوە، بەڵام ئەمجارەیان پرسە سیاسی و ئابوریی و ژینگەییەکان ئەولەوییەتی دانوستانەکانیانە لەگەڵ لایەنە عێراقییەکان."
بەگوێرەی راگەیەندراوەكە، لە بەشێکی دیکەی کۆبونەوەکەدا باسی حوکمڕانی و پرۆسەی ریفۆرم لە هەرێمی کوردستان کرا و جێگری سەرۆک وەزیران داوایکرد حکومەتی ئەڵمانیا زیاتر هاوکاری حکومەتی هەرێم بێت بە تایبەت لەڕوی ڕاوێژکارییەوە و لە بوارە جیاوازەکاندا کەسانی پسپۆڕ بنێرێتە کوردستان.
لە تەوەرێکیتری کۆبونەوەکەدا باس لە گرنگیدان بە بەرهەمهێنانی وزەی پاک کرا لە کوردستان و قوباد تاڵەبانی داوایکرد حکومەتی ئەڵمانیا لەمبارەیەوە هاوکاری هەرێمی کوردستان بکات.
بەگوێرەی راگەیەندراوەكە، لەلایەن خۆیەوە باڵیۆزی ئەڵمانیا خۆشحاڵی خۆی دەربڕی کە پرسی ژینگە و سۆلارسیستم لەم دوایانەدا لە کوردستان گرنگی پێ دەدرێت و ئامادەیی وڵاتەکەشی دەربڕی لەمبارەیەوە هاوکاری حکومەتی هەرێم بکات.