مسته‌فا كازمی، سه‌رۆك وه‌زیرانی عێراق له‌وتارێكدا داوای ئاساییكردنه‌وه‌ی بارودۆخی عێراق ده‌كات‌و ده‌ڵێت، "گه‌له‌كه‌مان تامه‌زرۆی ژیانه، حه‌زیان له‌ململانێ‌و خوێن‌و ناكۆكی‌و تۆڵه‌و ململانێ نییه‌و حه‌ز به‌خراپه‌كاری‌و ڕق‌و كینه ناكات‌و چاوه‌ڕێی داهاتویه‌كی یه‌كسانه به‌قه‌باره‌ی ئه‌و قوربانی‌و ئازارانه‌ی كه پێیدا تێپه‌ڕیون".
ئاوێنه: مسته‌فا كازمی له‌وتاره‌كه‌یدا وتی، "له‌م بارودۆخه زۆر هه‌ستیاره‌دا، به هه‌مو دڵسۆزی و خۆشه‌ویستییه‌كه‌وه، له‌م مانگه پیرۆز و موحه‌ڕه‌مه‌دا، قسه‌تان له‌گه‌ڵ ده‌كه‌م و ئێمه گه‌لێكین كه به باوه‌ڕبون به به‌ها و بنه‌ما به‌رز و به‌رزه‌كان ناسراون، ئه‌م گه‌له سه‌بر و فیداكاره، كه هه‌رگیز له پێناوی عێراقدا له باكوریترینی خۆیه‌وه تا باشوریترین و له ڕۆژهه‌ڵاته‌وه بۆ ڕۆژئاوای، به‌خشنده نه‌بوه، شایه‌نی وه‌ڵامێكه له‌لایه‌ن ئێمه‌وه كه له‌گه‌ڵ قه‌باره‌ی ئه‌و قوربانیدانه‌دا بگونجێت".
وتیشی، "گه‌له‌كه‌مان تامه‌زرۆی ژیانه، حه‌زیان له ململانێ و خوێن و ناكۆكی و تۆڵه و ململانێ نییه و حه‌ز به خراپه‌كاری و ڕق و كینه ناكات و چاوه‌ڕێی داهاتویه‌كی یه‌كسانه به قه‌باره‌ی ئه‌و قوربانی و ئازارانه‌ی كه پێیدا تێپه‌ڕیون".
مسته‌فا كازمی ده‌شڵێت، "به‌م پێیه ده‌بێت لایه‌نه سیاسییه‌كان له پێناو عێراق و عێراقییه‌كان دابنیشن و دانوستان بكه‌ن و بگه‌نه لێكتێگه‌یشتن، زمانی خیانه‌ت و دورخستنه‌وه دور بخرێته‌وه و ڕۆحی نیشتمانپه‌روه‌ری به‌رز و گشتگیر پیشان بدرێت، هه‌زار ڕۆژ بێده‌نگی و دیالۆگ، باشتره له‌وه‌ی دڵۆپێك خوێنی عێراقیه‌كان بڕژێت".
مسته‌فا كازمی ئاماژه‌ی به‌وه‌شكردوه، "داوا له هه‌مو لایه‌ك ده‌كه‌م هێمن و عه‌قڵانی بن و رانه‌كێشرێنه ناو ڕوبه‌ڕوبونه‌وه، داواش له هاوڵاتیان ده‌كه‌م پێكدادان له‌گه‌ڵ هێزه ئه‌منییه‌كان رابگرن و ڕێز له داموده‌زگاكانی ده‌وڵه‌ت بگرن، پێویسته هه‌مومان هاوكار بین بۆ وه‌ستاندنی ئه‌و كه‌سانه‌ی كه ئه‌م ئاژاوه‌یه خێراتر ده‌كه‌ن، هه‌روه‌ها ده‌بێت هه‌موان زۆر باش بزانن كه ئاگری ئاژاوه و شه‌ڕانگێزی هه‌موان ده‌سوتێنێت".
سه‌رۆك وه‌زیرانی عێراق ئه‌وه‌شی راگه‌یاند، "بارودۆخه‌كه زۆر سه‌خته، ئه‌مه‌ش واقیعێكی تاڵه به نیگه‌رانیه‌كی زۆره‌وه، ده‌بێت هاوكار بین و هه‌موان یه‌كبخه‌ین، بۆئه‌وه‌ی خۆمان پاڵ نه‌نێین بۆ ناو كۆتاییه‌كه، ده‌بێت عه‌قڵ و ویژدانمان به‌ڕێوه‌ببه‌ین و له ده‌وری عێراق و عێراقییه‌كان گردبونه‌وه بكه‌ین نه‌ك له ده‌وری به‌رژه‌وه‌ندی ته‌سك".
هه‌ر له‌و په‌یامه‌یدا مسته‌فا كازمی رایگه‌یاندوه، "هه‌موكه‌س به‌رپرسیارێتی له ئه‌ستۆدایه، حیزبه‌كان و چینی سیاسی و هێزه كۆمه‌ڵایه‌تیه‌كان و كاریگه‌ره‌كانی تر ده‌بێت بیڵێین، به‌ڵێ هه‌موان، و هه‌موان ده‌بێت به‌پێی یاساكانی حیكمه‌ت و تێڕوانین مامه‌ڵه بكه‌ن له پێناو عێراقدا، بۆئه‌وه‌ی جارێكی دیكه متمانه له‌ده‌ست نه‌ده‌ین".