جێنین پلاسخارت، نوێنەری تایبەتی سکرتێری گشتیی نەتەوە یەکگرتوەکان لە عێراق و باڵیۆزی ئێران لە عێراق لە كۆبونەوەیەكی نێوانیاندا پشتیوانی خۆیان بۆ حکومەتی عێراق و سەقامگیریی وڵاتەكە راگەیاند.
ئاوێنە: دوێنێ پێنجشەممە، جێنین پلاسخارت، نوێنەری تایبەتی سکرتێری گشتیی نەتەوە یەکگرتوەکان لە عێراق و محەمەد کازم ئال سادق، باڵیۆزی ئێران لە عێراق لە باڵیۆزخانەی ئێران کۆبونەوە.
بەپێی ئاژانسی ئێرنای ئێرانی "هەردولا باسیان لە سەقامگیری و ئاسایشی عێراق و ناوچەکەش کردوە، لەگەڵ گفتوگۆکردن لەسەر دوایین پێشهاتەکان و پشتیوانیکردنی عێراق و سەقامگیری و ئاسایشی ئەم وڵاتە."
پلاسخارت لە کۆبونەوەکەدا وەکو ئاژانسە ئێرانییەکە ئاماژەی بۆ کردوە باسی لە "رۆڵی پۆزەتیڤ"ی هەماهەنگی نێوان ئێران و عێراقی کردوە لە بەهێزکردنی سەقامگیریی ناوچەكە و جەختی لەسەر پێویستیی بەردەوامیپێدانی کردوەتەوە.
محەمەد کازم ئال سادق باڵیۆزی ئێران لە عێراق، لەو کۆبونەوەیەدا سەردانەکەی ئەم هەفتەیەی محەمەد شیاع سودانی، سەرۆکوەزیرانی عێراقی بۆ ئێران بە "هەنگاوێکی گرنگ و نایاب" وەسف کردوە.
باڵیۆزی ئێران داوای لە نەتەوە یەکگرتوەکان کردوە رۆڵی زیاتر بگێڕێت لە پشتیوانیکردنی حکومەتی عێراق بۆ باشترکردنی دۆخی ئەمنی و ناوچەكە، هەروەها ئاماژەی بۆ کاریگەریی ئاسایشی عێراق لەسەر ئاسایشی دراوسێیەکانی و سەقامگیریی ناوچەکەی کردوە.