ئەنجومەنی سیاسیی فەیلی لە ساڵیادی دەرچونی بڕیاری دادگای باڵای تاوانەكانی عێراق بۆ بە جینۆسایدناساندنی تاوانەكانی دژبە فەیلییەكان رایدەگەیەنێت كە بڕیارەكە تەنها وەك مەرەكەبی سەر كاغەزە ماوەتەوەو دەشڵێت، سەرجەم حزب و لایەنە سیاسییەكان كێبڕكێیانە تاوەكو لە هەڵبژاردنی ئەنجومەنی پارێزگاكان لە بەغداو واست، كورسییەكانی كۆتای فەیلی لە فەیلییە رەسەنەكان زەوت بكەن.
ئاوێنە: ئەنجومەنی سیاسیی فەیلی، ئەمڕۆ چوارشەممە، لە راگەیەندراوێكدا بڕیاری دادگای باڵای تاوانەكانی عێراق بۆ بە جینۆسایدناساندنی تاوانەكانی دژبە فەیلییەكان بە بیرهێناوەتەوە كە لە 29ی 11ی 2010 دەرچوەو رایگەیاندوە، بڕیارەكە تەنها وەك مەرەكەبی سەر كاغەز ماوەتەوە.
ئەوەشی خستۆتەڕۆ، ئەمڕۆكە سەرجەم حزب و لایەنە سیاسییەكان كێبڕكێیانە لەگەڵ هێزە فەیلییە سەربەخۆكان لەسەر پشكی كۆتایی فەیلییەكان لە هەڵبژاردنی ئەنجومەنی پارێزگاكانی بەغداو واست و شەڕدەكەن لەپێناو زەوتكردنی كورسییە هەتیوەكانی فەیلییە رەسەنەكان "لەپێناو كۆتاییهێنان بە بونی فەیلییەكان بەشێوەیەك كە لە جەوهەردا جیاواز نییە لە تاوانی جینۆساید."
بەقسەی ئەنجومەنی سیاسیی فەیلی، حزبە سیاسییەكان ئەو كارە لە رێگەی هێنانی كاندیدی حزبی و سەربە ئەجێندا سیاسییەكانی خۆیانەوە دەكەن كە هیچ خەمێكیان نییە جگە لە سوتاندنی دەنگ و تێكدانی رێگە راستەكەی دەنگدەری فەیلی كە لەماوەی 20 ساڵی رابردوی پڕۆسەی سیاسیدا بۆتە مایەی ئەوەی كە پێكهاتەی فەیلی بەدەربكرێت لە هاوسەنگی نیشتمانی و ئیستحقاقی دەستوری خۆی.