باوه‌شی سه‌رۆکوه‌زیرانێک بۆ کۆستکه‌وتوانی وڵاته‌که‌ی

هیوا ناسیح
  2019-03-24     172

ئه‌وه‌ی له‌ وێنه‌که‌دا ده‌یبینن جاسیندا ئاردرین ژنه‌ سه‌رۆکوه‌زیرانی وڵاتی نیوزیله‌نده‌یه‌، که‌ پاش رووداوه‌ تیرۆریستییه‌که‌ی هه‌ینی رابردوو بۆ سه‌ر مزگه‌وتی موسوڵمانه‌کان سه‌ردانی که‌سوکاری قوربانییانی کرد و ئاوا باوه‌شی سۆزی پێدا کردن و هاوخه‌می خۆی و حکومه‌ته‌که‌ی بۆ ده‌ربڕین... 
نیوزیله‌ندا ئه‌و ولاته‌ توڕدراوه‌ی بنی دونیا و نێو زه‌ریای پاسیفیک، ئه‌م ژنه‌ گه‌نجه‌ مه‌سیحیه‌ ٣٨ ساڵه‌یه‌ سه‌رۆکوه‌زیرانییه‌تی، موسوڵمانان که‌مینه‌یه‌کی زۆر زۆر بچوکن (نزیکه‌ی له‌ سه‌دا یه‌ک). له‌و وڵاته‌ زۆرینه‌یان هه‌ڵگری ئاینی مه‌سیحین (٤٨٪) زیاتر له‌ سێیه‌کی خه‌ڵکه‌که‌شی بێ ئاینن (٤٢٪)، به‌ڵام که‌لتوری پێکه‌وه‌ژیان به‌هێزه‌. بۆیه‌ تیرۆریستێک ناتوانێت ئه‌و که‌لتوره‌ پێشکه‌وتوه‌ تێکبشکێنێت... 
ئه‌رێ سه‌رۆکوه‌زیرانی هیچ وڵاتێکی ئیسلامیتان بینیوه‌ ئاوا باوه‌ش بکات به‌ قوربانییانی تیرۆری که‌مینه‌یه‌کی ئاینی له‌ وڵاته‌که‌ی خۆیاندا؟؟؟ 
با جارێ بپرسین، ئایا سه‌رۆکوه‌زیرانی ئه‌م وڵاتانه‌ ئاوا له‌ دڵه‌وه‌ و له‌ نزیکه‌وه‌ هاوسۆزی خۆیان بۆ قوربانییانی تیرۆر ده‌ربڕیوه‌؟؟
بۆ جارێکیش سه‌رۆکی هه‌رێمی خۆمان باوه‌شێکی ئاوای کردوه‌ به‌ که‌سوکاری قوربانییانی هه‌ڵه‌بجه‌ و ئه‌نفالدا؟؟
ئه‌ی سه‌رۆک وه‌زیرانی خۆمان بۆ جارێکیش باوه‌شێکی ئاوای کردوه ‌به‌ که‌سوکاری کۆمه‌ڵکوژیی ئێزیدییه‌کاندا؟؟؟؟
ئاخر سه‌رۆکایه‌تی وڵات و سه‌رۆکوه‌زیرانێتی ئاوا ده‌بێت، ده‌بێت هی هه‌موو هاوڵاتیانی بێت نه‌ک ته‌نها هی ناوچه‌ و حزب و عه‌شیره‌ته‌که‌ی. ئاخر گه‌ر کاردانه‌وه‌ و هاوخه‌می له‌ دڵه‌وه‌ بوو نه‌ک کارێکی دیپلۆماسی و نمایشی راگه‌یاندن، لای هاوڵاتیانیشی ده‌چێته‌ دڵه‌وه‌..
ئه‌م ژنه‌ له‌وه‌تی ئه‌و کاره‌ساته‌ روویداوه‌، ده‌چێته‌ مزگه‌وته‌کان، ده‌چێته‌ تازیه‌کان، ده‌چێته‌ ماڵه‌کان، باوه‌شی گه‌رم و پر سۆزیان پێد ده‌کات، نه‌ک به‌ لێپرسراوی راگه‌یاندنه‌که‌ی بڵێت تازیه‌نامه‌یه‌ک به‌ ناوی ئه‌وه‌وه‌ بڵاو بکه‌نه‌‌وه، وه‌ک له‌ رۆژهه‌ڵاتی خۆماندا باوه‌.
له‌ وته‌یه‌‌کیدا ئه‌م ژنه‌ لێهاتوه‌ دڵسۆزه‌ له‌ به‌رده‌م په‌رله‌مانی وڵاته‌که‌ی گوتی(( من نامه‌وێت هه‌رگیز ناوی ئه‌و تاوانباره‌، خوێنرێژه‌، تیرۆریسته‌، ناپاکه بهێنم. ناوی ئه‌و به‌ زمانمدا نایه‌ت...ئێمه‌ هه‌موو یه‌کین. تیرۆر ناتوانێت لاوازمان بکات...هتد))
بۆ ساتێک به‌راوردی خۆمان و ئه‌وان بکه‌ین، تێده‌گه‌ین ئێمه‌ له‌ کوێین و ئه‌وان له‌ کوێ!

زۆرترین بینراو
© 2018 Awene Online, Inc. All Rights Reserved.
×